कल्याणमधल्या भीषण आगीत 2 गाड्या जळाल्या

कल्याण पश्चिमेतील चिकणघर आणि खडकपाडा परिसरात असणाऱ्या गॅरेजला आज रात्रीच्या सुमारास भीषण आग लागली.

ऑनलाइन लोकमत
कल्याण, दि. 31 - कल्याण पश्चिमेतील चिकणघर आणि खडकपाडा परिसरात असणाऱ्या गॅरेजला आज रात्रीच्या सुमारास भीषण आग लागली. या आगीत गॅरेजसह त्यातील 2 गाड्यांचाही अक्षरशः कोळसा झाला. फटाक्यांमुळे ही आग लागल्याचा प्राथमिक अंदाज अग्निशमन दलाने वर्तवला आहे.

येथील खडकपाडाकडून चिकणघरकडे जाणाऱ्या रस्त्यावर संदीप हॉटलेच्या मागे हे गॅरेज आहे. रात्री 9 वाजण्याच्या सुमारास ही आग लागल्याचे सांगण्यात आले. या गॅरेजमध्ये असणाऱ्या ऑइल आणि इतर ज्वलनशील पदार्थांमुळे आगीने काही क्षणातच रौद्र रूप धारण केले.

आगीची माहिती मिळताच कल्याण डोंबिवली अग्निशमन दलाने घटनास्थळी धाव घेतली. मात्र अग्निशमन दलाने आगीवर नियंत्रण मिळवेपर्यंत गॅरेज, त्यातील 2 गाड्या (4 व्हीलर) आणि गॅरेजशेजारील पानाची टपरी पूर्ण जळून खाक झाली होती. अग्निशमन दलाच्या 3 गाड्यांच्या साहाय्याने ही आग नियंत्रणात आणली गेली.