'काश्मिरींची हत्या करण्यासाठी दहशतवादी झाकीर मुसा करतोय भारतीय लष्कराची मदत'

जम्मू काश्मीरमधील शोपियन येथे सर्व ठिकाणी हिजबूल मुजाहिद्दीनचे पोस्टर्स चिकटवलेले दिसत आहेत. या पोस्टर्सच्या माध्यमातून हिजबूलने आपला माजी कमांडर झाकीर मुसाविरोधात राग व्यक्त केला आहे.

ठळक मुद्देजम्मू काश्मीरमधील शोपियन येथे सर्व ठिकाणी हिजबूल मुजाहिद्दीनचे पोस्टर्स चिकटवण्यात आले आहेतझाकीर मूसा काश्मिरींची हत्या करण्यासाठी भारतीय लष्कराच्या जवानांची मदत करत आहे असं या पोस्टर्समध्ये लिहिण्यात आलं आहे'हा भारतीय एजंट झाकीर मूसा जिथे कुठे भेटेल, त्याला पकडून मारुन टाका', असं आवाहनच हिजबूल मुजाहिद्दीनचे पोस्टर्समधून केलं आहे

श्रीनगर, दि. 18 - जम्मू काश्मीरमधील शोपियन येथे सर्व ठिकाणी हिजबूल मुजाहिद्दीनचे पोस्टर्स चिकटवलेले दिसत आहेत. या पोस्टर्सच्या माध्यमातून हिजबूलने आपला माजी कमांडर झाकीर मुसाविरोधात राग व्यक्त केला आहे. झाकीर मूसा काश्मिरींची हत्या करण्यासाठी भारतीय लष्कराच्या जवानांची मदत करत आहे असं या पोस्टर्समध्ये लिहिण्यात आलं आहे. पोस्टर्सच्या माध्यमातून लोकांनाही उकसवण्याचा प्रयत्न करण्यात आला आहे. 'हा भारतीय एजंट झाकीर मूसा जिथे कुठे भेटेल, त्याला पकडून मारुन टाका', असं आवाहनच हिजबूल मुजाहिद्दीनचे पोस्टर्समधून केलं आहे. 

हे पोस्टर्स उर्दू भाषेत आहेत. सर्व पोस्टर्समध्ये झाकीर मुसाचा फोटो लावण्यात आला आहे. पोस्टर्समधून दावा करण्यात आला आहे की, 'भारतीय लष्कराकडून मोठी रक्कम घेऊन झाकीर मुसा निर्दोष काश्मिरींची हत्या करत आहे. विश्वासघाती सरकारला मदत करत झाकीर मूसा श्रीमंत होण्याची स्वप्नं बघत आहे. सुरुवातील तो हिजबून मुजाहिद्दीनचा भाग होता, पण आता त्याने भारत सरकारशी हातमिळवणी केली आहे. अशा परिस्थितीत तो जिथे कुठे भेटेल, त्याला मारुन टाका'.

23 वर्षीय झाकीर मूसा याने काही महिन्यांपुर्वी हिजबूल मुजाहिद्दीनची साथ सोडत 'गजवा-ए-हिंद'मध्ये (अल कायदाची दहशतवादी संघटना) सामील झाला होता. आपण दहशतवादी संघटनेचा प्रमुख असल्याचा दावा तो करत आला आहे.  झाकीर मुसाने हिजबूलची साथ सोडताना सांगितलं होतं की, 'फुटीरवादी संघटना हुर्रियत कॉन्फरन्स काश्मीरला राजकीय समस्सा सांगत सामान्य लोकांना फासावर लटकवत आहे'. 

याचवर्षी जुलै महिन्यात अल कायदाने झाकीर मुसा 'गजवा-ए-हिंद'चा प्रमुख असेल अशी घोषणा केली होती. काश्मीरला मुस्लिम राष्ट्र बनवण्यासाठी जिहादचा झेंडा फडकावणं गरजेचं आहे. यासाठी झाकीर मुसाकडे सुत्रं सोपवण्यात आली आहेत असं अल कायदाने सांगितलं होतं. 

बकरी ईदच्या आधी झाकीर मुसाने भारताला गोभक्त पंतप्रधान नरेंद्र मोदी आणि हिंदूपासून मुक्त करणार असल्याची धमकी दिली होती. बकरी-ईदच्या आधी झाकीर मुसाने 10 मिनिटांचा ऑडिओ मेसेज जारी करत ही धमकी दिली होती.  'गोभक्त नरेंद्र मोदी राजकारण आणि डिप्लोमसी करत लोक जमा करु शकतात, मात्र ते आम्हाला थांबवू शकत नाहीत. आम्ही भारतात इस्लामचा झेंडा फडकावल्याशिवाय राहणार नाही', असं झाकीर मुसा बोलला होता.