बलात्काराचा प्रयत्न करणा-यांशी तरुणीचा धाडसी लढा

बंगळुरु, दि. 19 - बलात्कार करण्याचा प्रयत्न करणा-या नराधमांशी लढा देत धाडसी तरुणीने स्वत:ची सुटका करुन घेतली. 24 वर्षीय सोनमवर तीन तरुणांनी बलात्काराचा प्रयत्न केला होता. मात्र सोनमने त्यांच्याशी धाडसाने सामना करत सुटका करुन घेतली आणि पळ काढला. पोलिसांनी तिन्ही आरोपींना अटक केली आहे. तरुणीच्या या धाडसाचं सर्वांकडून कौतुक केलं जात आहे. 

 

सोनम भुटानची रहिवासी असून ब्युटिशिअन म्हणून काम करते. सहा महिन्यापुर्वी ती बंगळुरुत आली होती. रविवारी रात्री एका वाढदिवसाच्या पार्टीला ती गेली होती जिथे तिची भेट आरोपीशी झाली. आरोपीने सोनमला धुम्रपान करण्यासाठी आमंत्रित केलं. आरोपीच्या डोक्यात भलताच विचार असल्याची कल्पना नसलेल्या सोनमने त्यांचं आमंत्रण स्विकारलं आणि त्यांच्या अपार्टमेंटमध्ये गेली. अपार्टमध्ये आरोपीचे दोन मित्रही उपस्थित होते. 

 

अपार्टमेंटमध्ये मला जबरदस्तीने दारु पाजल्याचा आरोप पिडीत तरुणी सोनमने केला आहे. 'मुख्तियार, खदीम आणि बाबू अशी या आरोपींची नावे असून सर्वजण स्नॅक पार्लरमध्ये काम करतात. तिन्ही तरुण आसामचे रहिवासी आहेत. आरोपींनी जेव्हा बलात्काराचा प्रयत्न केला तेव्हा पिडीत तरुणीने त्यांना सोडण्याची विनंती केली. अपार्टमेंटमध्ये जाण्याआधी पिडीत तरुणी आपल्या बॉयफ्रेंडशी बोलत होती. तिने फोन कट केल्याने त्याला शंका आली. पिडीत तरुणीने अखेर तरुणांशी धाडसाने लढा देत स्वत:ची सुटका करुन घेतली आणि रस्त्यावर धावत सुटली', अशी माहिती तपास अधिका-याने दिली आहे. 

 

पिडीत तरुणीने रस्त्यावरील एका व्यक्तीकडे धाव घेतल मदतीची मागणी केली.पण त्याला तिची भाषा कळत नसल्याने त्याला आरोपी तिचे मित्र असल्याचं वाटलं आणि त्याने तिला त्यांच्या हवाली केलं. आरोपींनी तिला ओढत पुन्हा अपार्टमेंटमध्ये नेण्याचा प्रयत्न केला. त्यावेळी तिने पुन्हा आपली सुटका करुन घेतली आणि एका दांपत्याकडे मदतीसाठी धाव घेतली. त्यांनी लगेच पोलिसांना फोन करुन माहिती दिली ज्यानंतर आरोपींनी अपार्टमेंटमध्ये धाव घेतली. पोलिसांनी तिन्ही तरुणांना अटक केली आहे. 

 

तरुणीने दिलेल्या जबाबाप्रमाणे तिच्यावर बलात्कार झालेला नाही. तिच्यावर बलात्कार झाला नसला तरी आरोपींवर बलात्काराचा गुन्हा नोंद करण्यात आला आहे, त्यांना कडक शिक्षा करण्यात येईल अशी माहिती पोलिसांनी दिली आहे.