मुंबई, दि. 22 - टीम इंडियाचे माजी प्रशिक्षक अनिल कुंबळे आणि कर्णधार विराट कोहली यांच्यातील कथित वाद शिगेला पोहोचल्याचे जगजाहीर झाल्यानंतर विराट कोहलीवर टीकेची झोड उठत आहे. लोकमतच्या ऑनलाइन पोलमध्येही कोहलीवर चाहत्यांनी "विराट" तोंडसूख घेतलं आहे. कुंबळेच प्रशिक्षक हवा असा कौल नेटीझन्सनी दिला आहे.  या पोलमध्ये कुंबळेसमोर विराट क्लीन बोल्ड झाला आहे, काहींनी तर विराटपेक्षा धोनीच चांगला असंही मत व्यक्त केलं आहे. लोकमतच्या पोलमध्ये कुंबळेने कोहलीपेक्षा जवळपास तिप्पट मतं मिळवली आहेत.  

 

चॅम्पियन्स ट्रॉफी सुरू होण्याआधीपासूनच कुंबळे आणि कोहली यांच्यात सर्वकाही आलबेल नसल्याचं म्हटलं जात होतं. आता कुंबळेंनी राजीनामा दिल्यानंतर दोघांबाबात रोज नवनवे खुलासे होतच आहेत. त्यातच कोहलीने कुंबळेंची प्रशिक्षकपदावर नियुक्ती झाल्यानंतर कुंबळेच्या स्वागतासाठी केलेलं ट्विट डिलीट करुन हा वाद किती पराकोटीला गेला आहे हेच दाखवून दिलं आहे.

 

पाकिस्तानसोबत झालेल्या मानहानीकारक पराभवामुळे आधीच चिडलेल्या देशभरातील क्रिकेट चाहत्यांमध्ये कुंबळे-कोहलीच्या वादाच्या पार्श्वभूमिवर विविध प्रतिक्रिया उमटत आहेत. त्यामुळेच या वादामध्ये क्रिकेटचे चाहते नक्की कोणाच्या बाजूने आहेत हे जाणून घेण्याचा प्रयत्न लोकमतने केला. आम्ही घेतलेल्या लाइव्ह पोलला अल्पावधीतच मोठा प्रतिसाद मिळाला. अनिल कुंबळेच्या प्रशिक्षकपदाच्या राजीनाम्यानंतर "कोहली कॅम्प" टीकेचं लक्ष्य ठरला आहे. कॅप्टन कोहलीनं कुंबळेसारख्या "जंटलमन" क्रिकेटवीराचा बळी घेतला, असा सूर क्रिकेटवर्तुळात ऐकू येतोय. हाच मुद्दा पकडून लोकमतने तुम्ही कोणाच्या बाजूने कोहली की कुंबळे? असा प्रश्न चाहत्यांना विचारला होता. केवळ तीन तासांसाठी घेतलेल्या या पोलमध्ये चाहत्यांनी उदंड प्रतिसाद दिला.

अवघ्या दोन तासात या पोलमध्ये 22 हजाराहून जास्त चाहत्यांनी आपलं मत नोंदवलं. यामध्ये चाहत्यांचा कौल हा स्पष्टपणे अनिल कुंबळेच्याच बाजूने असल्याचं पाहायला मिळालं. 16 हजार 500 हून अधिक मतं कुंबळेच्या बाजूने पडली तर कोहली योग्य असल्याचं केवळ 6 हजार चाहत्यांचं मत होतं. म्हणजेच कुंबळेची विकेट घेऊन कोहलीने चाहत्यांचा रोष ओढावून घेतल्याचं हा पोल स्पष्टपणे सांगत आहे.