कोणता क्रिकेटर आवडतो विचारणा-या पत्रकाराला मिताली राजचं "कडक" उत्तर

भारतीय महिला क्रिकेट टीमची कॅप्टन मिताली राज ही आपल्या सडेतोड उत्तरांसाठीही ओळखली जाते. याचाच अनुभव पत्रकारांना गुरूवारी पुन्हा एकदा आला.

 ऑनलाइन लोकमत

लंडन, दि. 23 - भारतीय महिला क्रिकेट टीमची कॅप्टन मिताली राज ही आपल्या सडेतोड उत्तरांसाठीही ओळखली जाते. याचाच अनुभव पत्रकारांना गुरूवारी पुन्हा एकदा आला. 

 

भारतीय महिला क्रिकेट संघ शनिवारपासून महिला वर्ल्ड कप टुर्नामेंटच्या अभियानाला सुरूवात करणार आहे. त्यापुर्वी झालेल्या पत्रकार परिषदेत  कोणता पुरूष क्रिकेटपटू आवडतो असं मिताली राजला एका पत्रकाराने विचारलं. या प्रश्नावर मिताली चांगलीच भडकली. 

 

तुम्ही पुरूष क्रिकेट खेळाडूंनाही हाच प्रश्न विचारतात का? त्यांना कोणती महिला क्रिकेटपटू आवडते हे तुम्ही विचारतात का? मला सातत्याने हा प्रश्न विचारला जातो. तुम्ही पुरूष क्रिकेटपटूंनाही हा प्रश्न विचारायला पाहिजे असं उत्तर देऊन मितालीने पत्रकाराची बोलती बंद केली.

 

पुरूषांच्या तुलनेत महिला क्रिकेटपटूंच्या लोकप्रियतेमध्ये बराच फरक आहे यावरही मितालीने जोर दिला.  आमचे सर्व सामने टीव्हीवर दाखवले जात नाहीत. मात्र बीसीसीआयने गेल्या दोन मालिकांचं टीव्हीवर प्रसारण करून चांगली सुरूवात केली असून त्याचा चांगला परिणामही झाला आहे. मात्र, अजून आम्हाला खरी ओळख मिळवायला वेळ लागेल,असं मिताली म्हणाली.