तब्बल २४ मेगापिक्सल्सच्या फ्रंट कॅमेर्‍याने सज्ज विवो व्ही ७ प्लस !

विवो कंपनीने २४ मेगापिक्सल्स क्षमतेचा फ्रंट कॅमेरा असणारा विवो व्ही ७ प्लस हा स्मार्टफोन २१,९९० रूपये मूल्यात भारतीय ग्राहकांना सादर केला आहे.

ठळक मुद्देअलीकडे काही कंपन्या सेल्फी केंद्रीत स्मार्टफोनला प्राधान्य देत आहेतयात विवो या चिनी कंपनीचे नाव आघाडीवर आहेया अनुषंगाने आज विवो व्ही ७ प्लस हे मॉडेल भारतीय बाजारपेठेत दाखल करण्यात आले

विवो कंपनीने २४ मेगापिक्सल्स क्षमतेचा फ्रंट कॅमेरा असणारा विवो व्ही ७ प्लस हा स्मार्टफोन २१,९९० रूपये मूल्यात भारतीय ग्राहकांना सादर केला आहे. अलीकडे काही कंपन्या सेल्फी केंद्रीत स्मार्टफोनला प्राधान्य देत असल्याचे दिसून येत असून यात विवो या चिनी कंपनीचे नाव आघाडीवर आहे. या अनुषंगाने आज विवो व्ही ७ प्लस हे मॉडेल भारतीय बाजारपेठेत दाखल करण्यात आले. गोल्ड, रोझ गोल्ड आणि मॅट ब्लॅक या रंगांमध्ये उपलब्ध करण्यात आलेल्या या स्मार्टफोनची आजपासून कंपनीच्या संकेतस्थळासह फ्लिपकार्टवरून अगावू नोंदणी सुरू झाली असून ग्राहकांना प्रत्यक्षात हे मॉडेल १५ सप्टेंबरपासून मिळणार आहे.

शीर्षकात नमूद असल्यानुसार विवो व्ही ७ प्लस या मॉडेलची खासियत म्हणजे यात २४ मेगापिक्सल्सचा फ्रंट कॅमेरा असेल. हा कॅमेरा एफ/२.० अपार्चरयुक्त असून याला मूनलाईट ग्लो या प्रकारच्या सेल्फी फ्लॅशची सुविधा असेल. अर्थात याच्या मदतीने अतिशय उत्तम सेल्फी घेता येणार असल्याचा विवो कंपनीचा दावा आहे. तर याच्या मागील बाजूस एफ/२.० अपार्चर आणि ड्युअल एलईडी फ्लॅशयुक्त १६ मेगापिक्सल्सचा कॅमेरा असेल.

उर्वरित फिचर्सचा विचार करता विवो व्ही ७ प्लस या मॉडेलमध्ये ५.९९ इंच आकारमानाचा आणि एचडी (१४४० बाय ७२० पिक्सल्स) क्षमतेचा २.५ डी आयपीएस इनसेल फुल व्ह्यू या प्रकारातील डिस्प्ले असेल. हा डिस्प्ले १९:९ अस्पेक्ट रेशोयुक्त असून यावर कॉर्नींग गोरीला ग्लास ३ चे संरक्षक आवरण असेल. हा डिस्प्ले दिसण्यास अत्यंत आकर्षक असून जवळपास कडा विरहीत या प्रकारातील आहे. विवो व्ही ७ प्लस  हा स्मार्टफोन ऑक्टा-कोअर क्वॉलकॉम स्नॅपड्रॅगन ४५० या प्रोसेसरने सज्ज असेल. याची रॅम ४ जीबी आणि इनबिल्ट स्टोअरेज ६४ जीबी असून ते मायक्रो-एसडी कार्डच्या मदतीने २५६ जीबीपर्यंत वाढविणे शक्य आहे. विवो व्ही ७ प्लस हे मॉडेल अँड्रॉइडच्या नोगट आवृत्तीवर आधारित असलेल्या फनटच ओएस ३.२वर चालणारा असेल. तर यातील बॅटरी ३२२५ मिलीअँपिअर क्षमतेची आहे. यात फोर-जी व्हिओ-एलटीई नेटवर्क सपोर्टसह ब्ल्यू-टुथ, वाय-फाय, जीपीएस, मायक्रो-युएसबी आदी फिचर्स असतील. तर यात अ‍ॅक्सलेरोमीटर, गायरोस्कोप, ग्रॅव्हीटी, अँबिअंट लाईट, डिजीटल कंपास आदी सेन्सर्सदेखील प्रदान करण्यात आले आहेत.