पालघरचे भाजपा खासदार राजेंद्र गावित यांना मारहाण

मीरा रोडच्या जोगर्स पार्कमधील रखवालदारास मारहाण करणाऱ्यांपासून वाचवण्यासाठी गेलेले पालघरचे भाजपा खासदार राजेंद्र गावित यांना मारहाण करण्यात आली आहे.

मीरा रोड - मीरा रोडच्या जोगर्स पार्कमधील रखवालदारास मारहाण करणाऱ्यांपासून वाचवण्यासाठी गेलेले पालघरचे भाजपा खासदार राजेंद्र गावित यांना अर्वाच्च शिवीगाळ, दमदाटी करत मारण्यास धावून जाणाऱ्या 5 जणांना नया नगर पोलिसांनी अटक केली आहे. 

मीरा रोड पूर्वेला रेल्वेमार्गालगत पालिकेचे जोगर्स पार्क आहे. गावित हे मीरा रोड येथेच राहायला असून ते रोज सकाळी येथे येत असतात. काल मंगळवारी सकाळी 9च्या सुमारास ते जोगर्स पार्कमध्ये फेरफटका मारत होते. त्यावेळी गवतात बूट घालून चालू नका म्हणून सांगणाऱ्या रखवालदारासोबत 8 ते 9 जण अर्वाच्च शिवीगाळ करत मारत होते. गावित हे रखवालदारास सोडवण्यासाठी मध्ये पडले असता त्या टोळक्याने त्यांनासुद्धा शिवीगाळ करत मारण्यास अंगावर धावून गेले. आपण खासदार असल्याचे सांगून देखील त्यांनी अरेरावी सुरूच ठेवली. गावित यांनी पोलिसांना कळवले असता पोलीस घटनास्थळी धावून आले. 

या प्रकरणी रखवालदाराकडून पोलिसात तक्रार दाखल करण्यात आल्यावर कीर्ती शेट्टी, राजेश विश्वनाथ शेट्टी, नवीन विठ्ठल शेट्टी, सुकेश शेट्टी व शिवराम शेट्टी या पाच जणांना पोलिसांनी अटक केली आहे. अन्य तीन ते चार आरोपींचा शोध सुरू असल्याचे पोलिसांनी सांगितले.  पोलिस निरीक्षक बालाजी पांढरे यांच्या मार्गदर्शनाखाली सहाय्यक निरीक्षक अतिग्रे तपास करत आहेत.