शाळकरी विद्यार्थ्याचा अपघातात मृत्यू

पोलादपूर - तालुक्यातील मोरसाडे विद्यालयातील इयत्ता ५ वीत शिकत असलेल्या विद्यार्थ्याचा डम्पर अपघातात दुर्दैवी मृत्यू झाला. या घटनेने संपूर्ण गावावर शोककळा पसरली आहे. या अपघाताची नोंद पोलादपूर पोलीस ठाण्यात करण्यात आली आहे.

अपघाताची माहिती चंद्रकांत पार्टे यांनी पोलिसात दिली. चंद्रकांत पार्टे यांचा पुतण्या पांडुरंग नारायण पार्टे हे त्यांच्या मालकीचा डम्पर बुधवारी ६ फेब्रुवारी रोजी दुपारी ४.३० वाजताच्या सुमारास त्यांच्या घराच्या मागील बाजूस रस्त्याच्या कडेला पार्किंग करत असताना त्यांचा मुलगा ओंकार हा डम्परच्या मागील बाजूस उभा होता. या वेळी पांडुरंग पार्टे यांचा वाहनावरील ताबा सुटून डम्पर रस्त्याच्या बाजूला घसरल्याने उभ्या असलेल्या ओंकारच्या कमरेवरून डम्परचा टायर गेला.

या अपघातानंतर गंभीर जखमी झालेल्या ओंकारला तातडीने महाड येथे उपचारासाठी हलविण्यात आले, मात्र उपचारादरम्यान ओंकार याचा दुर्दैवी मृत्यू झाला. या अपघाताची नोंद पोलादपूर पोलीस ठाण्यात करण्यात आली आहे.