एमडी पावडरप्रकरणी नाशिकमधील रेकॉर्डवरील गुन्हेगारास तिघांना ठाण्यात अटक ; साडेसोळा लाखांचा मुद्देमाल जप्त

ठाणे शहर पोलिसांच्या कारवाईत अंमली पदार्थ नेणारा नाशिकातील रेकॉर्डवरील हाती लागला आहे. तसेच हा साठा मध्यप्रदेशातून आल्याचे समोर आले आहे.

ठळक मुद्देनाशिकात अक्रम खान याच्यावर विविध १८ गुन्हे दाखलहा साठा मध्य प्रदेशात आल्याचे तपासात पुढे

ठाणे : नाशिकात मेफेड्रॉन (एमडी पावडर) हे अमली पदार्थविक्रीसाठी नेणा-या नाशिकमधील रेकॉर्डवरील गुन्हेगारासह तिघांना ठाणे पोलिसांना अटक केली. त्यांच्याकडून ८२२ ग्रॅम एमडी पावडर जप्त केली असून त्याची किंमत १६ लाख ४४ हजार रुपये आहे. अटकेतील नाशिकच्या गंजमाळ येथील अक्रम खान (३०) याच्याविरोधात नाशिकात विविध प्रकारचे १८ गुन्हे दाखल असून त्याच्याविरोधात मोक्कांतर्गत कारवाई केली आहे. तसेच तो त्या गुन्ह्यात फरार असल्याची माहिती ठाणे शहर अप्पर पोलीस आयुक्त मकरंद रानडे यांनी शनिवारी पत्रकार परिषदेत दिली. या कारवाईत एमडीचे मध्य प्रदेश कनेक्शनही पुढे आले असून त्यानुसार पोलीस तपास सुरू आहे.
नाशिक येथील रेकॉर्डवरील घरफोडी, चोरी, जबरी चोरी आणि सोनसाखळी चोरणारा सराईत गुन्हेगार अक्रम खान हा एमडी पावडरविक्रीसाठी ठाण्यातील नितीन चौक येथे येणार असल्याची माहिती ठाणे शहर पोलिसांच्या (गुन्हे शाखा) वागळे इस्टेट युनिट ५ चे वरिष्ठ पोलीस निरीक्षक जयराज रणवरे यांना मिळाली होती. त्यानुसार, सापळा रचून अक्रमला ताब्यात घेतले. तसेच त्याच्याकडून १६ लाख ४४ हजारांची ८२२ ग्रॅम वजनाची एमडी पावडरही जप्त केली. तपासात त्याच्यावर नाशिक पोलीस आयुक्तालयातील वेगवेगळ्या पोलीस ठाण्यांत घरफोडी, चोरी, जबरी चोरी, सोनसाखळी असे १८ गुन्हे दाखल असून त्याच्यावर नाशिकमधील मुंबईनाका पोलिसांनी मोक्कांतर्गत कारवाई केली आहे. तसेच त्याच्याकडून जप्त केलेल्या एमडी पावडरचा साठा मध्य प्रदेश, इंदूर येथील रईसउद्दीन सल्लाउद्दीन शेख (४५) आणि अजय जाधवन यांच्याकडून घेतल्याची कबुली दिली. त्यानुसार, त्यांना अटक केली. त्यांच्या चौकशीत हा साठा मध्य प्रदेशच्या बैतुल येथील भोलानामक व्यक्तीकडून घेतल्याची बाब पुढे आली आहे. अक्रम हा साठा नाशिकमध्ये नेत होता. या तिघांना ठाणे न्यायालयात हजर केल्यावर अक्रम याला ८ जानेवारी, तर रईस आणि अजय या दोघांना ११ जानेवारीपर्यंत पोलीस कोठडी सुनावली आहे. तसेच अक्रम याला या प्रकरणाचा तपास पूर्ण झाल्यावर नाशिक पोलिसांकडे वर्ग केले जाईल, असेही अप्पर पोलीस आयुक्त रानडे यांनी सांगितले. तिघांविरोधात अमली पदार्थविरोधीचे गुन्हे दाखल आहेत का, याचे रेकॉर्ड तपासले जात आहे. याप्रकरणी वागळे इस्टेट पोलीस ठाण्यात गुन्हा दाखल असून पुढील तपास पोलीस उपनिरीक्षक श्रीनिवास तुंगेनवार करत आहेत. 

ही कारवाई वरिष्ठ पोलीस निरीक्षक जयराज रणवरे, पोलीस उपनिरीक्षक शिवराज बेंद्रे, श्रीनिवास तुंगेनवार, सहायक पोलीस उपनिरीक्षक बाबू चव्हाण, प्रदीप कदम, पोलीस हवालदार विजयकुमार गो-हे, मनोज पवार, दिलीप तडवी, सोननीस, पोलीस नाईक गायकवाड, आर.आर. पाटील, रूपवंतराव शिंदे, राजेश क्षत्रिय, दिलीप शिंदे आदी पथकाने केली.