गेल्या तीन दिवसात झालेल्या संततधार पावसामुळे १४५ गावांतील ११ हजार ६०९ हेक्टरवरील पिकांचे नुकसान झाले आहे. दरम्यान बुलढाणा, शेगाव आणि मोताळा तालुक्यातील १३ मंडळामध्ये अतिवृष्टी झाल्याने जनजीवन विस्कळीत झाले होते. जिल्ह्यात आतापर्यंत वार्षिक सरासरीच्या १४ टक्के पाऊस अधिक झाला आहे.
पावसामुळे शेतशिवारात पाणीच पाणी साचले असून, कापूस, तूर, मका, सोयाबीन, उडीद या पिकांचे नुकसान झाले आहे. मेहकर तालुक्यातील ४८ हेक्टर जमीन पुराच्या पाण्यामुळे खरडून गेली आहे. बुलढाणा जिल्ह्यात आतापर्यंत वार्षिक सरासरीच्या ९०.५२ टक्के पाऊस झाला आहे.
जिल्ह्यात वार्षिक सरासरी ७६१.६ मिमी पाऊस पडत असतो. आतापर्यंत ६८९.४ मिमी पाऊस जिल्ह्यात झाला आहे. अतिवृष्टीमुळे मोताळा तालुक्यात सर्वाधिक नुकसान झाले असून त्या खालोखाल चिखली तालुक्यात, खामगाव, नांदुरा, बुलढाणा, मेहकर आणि लोणार तालुक्यात नुकसान झाले आहे. दरम्यान, बैल धुण्यास गेलेल्या मलकापूर तालुक्यातील दोन व मोताळा तालुक्यातील एकाचा पुराच्या पाण्यात बडून मुत्यू झाला आहे.
या मंडळांमध्ये झाली अतिवृष्टी
बुलडाणा, शेगाव आणि मोताळा या तीन तालुक्यांतील १३ मंडळांमध्ये अतिवृष्टी झाली आहे. यामध्ये बुलढाणा (६९.५०), धाड (७५.८०), पाडळी (१०१.५०), देऊळघाट (७२.५०), शेगाव (९३.५०), माटरगाव (७०,३०), जलंब (८७.३०), जांभूळ धाबा (९६.३०), धामणगाव बढे (८१), रोहीणखेड (१३३.३०), पिंपळगाव देवी (८१), नांदुरा (१०५,५०), निमगाव (७४.३० मिमी) या मंडळांत ही अतिवृष्टी झाली आहे.
तालुकानिहाय पिकांचे झालेले नुकसान
| तालुका | बाधित गावे | शेतकरी संख्या | बाधीत क्षेत्र (हेक्टरमध्ये) |
| बुलढाणा | ८ | ७५० | ३५० |
| चिखली | ३२ | ४२५० | २१५० |
| मोताळा | ३१ | २९७५ | ४६२० |
| खामगाव | २५ | ४००० | १७०० |
| शेगाव | २० | १५०० | ९५० |
| नांदुरा | १८ | २८०० | १२०० |
| मेहकर | ६ | ३६३ | ३७९ |
| लोणार | ५ | ५८७ | २६० |
| एकूण | १४५ | २६४२५ | १९६०९ |
४ तालुक्यात २६ घरांचे नुकसान !
बुलडाणा, मोताळा, संग्रामपूर आणि खामगाव तालुक्यातील ७ गावांमध्ये २६ घरांचे अंशतः नुकसान झाले आहे. खामगाव व मोताळा तालुक्यातील छोटी १३७ आणि एक मोठे अशी एकूण १२८ गुरे दगावली आहेत. दरम्यान, प्राथमिक अहवाल प्राप्त झाला असून अंतिम अहवाल बाकी आहे.