शेतकऱ्यांची दिवाळी अंधारात! शेतमालाला किती मिळतोय भाव?

दिवाळीत तरी चांगला दर मिळेल या आशेने अनेक शेतकऱ्यांनी खरिपाचा माल साठवून ठेवला होता. पण दर स्थिर असल्याने शेतकऱ्यांची निराशा झाली आहे. 

दिवाळीच्या निमित्ताने राज्यातील काही बाजार समित्या बंद तर अनेक बाजार समित्यांमध्ये मुहूर्ताची खरेदी झाली. यावेळी खरिपाच्या कापूस, सोयाबीन, कांदा, तूर अशा उत्पादनांची आवक झाली होती तर दिवाळीनिमित्ताने झेंडूचीही आवक झाली होती. आजचे बाजारभाव स्थिर असल्याचं चित्र होतं. दिवाळीत तरी चांगला दर मिळेल या आशेने अनेक शेतकऱ्यांनी खरिपाचा माल साठवून ठेवला होता. पण दर स्थिर असल्याने शेतकऱ्यांची निराशा झाली आहे. 

दरम्यान, दसऱ्याच्या तुलनेत आज झेंडूला चांगला दर मिळाला. पुणे बाजार समितीत ९५६ क्विंटल झेंडूची आवक झाली होती. तर ४ हजार रूपये प्रतिक्विंटल ते ८ हजार रूपये प्रतिक्विंटल एवढा दर मिळाला आहे. सोयाबीनचा विचार केला तर मागच्या काही दिवासांपासून सोयाबीनच्या दरात जास्त वाढ झाल्याचं चित्र नाही. ४ हजार ४०० ते ५ हजारांपर्यंत सरासरी दर मिळताना दिसत आहे. आज वरोरा  बाजार समितीत ३ हजार रूपये एवढा सर्वांत कमी किमान दर मिळाला तर परभणी बाजार समितीत ५ हजार ५० रूपये एवढा दर मिळाला. 

मागच्या काही दिवसांपासून कांद्याचे दर कोसळले आहेत. ७ हजारांवर गेलेले कांद्याचे दर आता २ ते ३ हजारांवर येऊन ठेपले आहेत. तर आज ३०० रूपये ते ४ हजार २०० रूपयांपर्यंत किमान तर २ हजार ५०० ते ५ हजार ५०० रूपयांपर्यंत कमाल दर कांद्याला मिळाला. सरासरी दर हे १ हजार ४०० ते ५ हजारांच्या दरम्यान होते. तर कापसांच्या दरातही जास्त हालचाल दिसून आली नाही. ७ हजार ते ७ हजार १०० रूपये प्रतिक्विंटल दराने कापसाची विक्री होताना दिसत आहे. 

मागच्या एका महिन्यापासून कोणत्याच शेतमालाला चांगला दर मिळताना दिसत नाही. कांदा, सोयाबीनचेही दरही केंद्र सरकारने दाबून ठेवले आहेत. कांद्यावरील निर्यात मूल्य आणि निर्यात शुल्कात वाढ करून मोठ्या धक्का शेतकऱ्यांना दिला आहे. महाराष्ट्रात अनेक ठिकाणी दुष्काळ सदृश्य स्थिती आहे, पण केवळ ४० तालुक्यांत दुष्काळ जाहीर केला आहे. तर अनेक शेतकऱ्यांना पीकविमा अग्रीमची रक्कमही मिळाली नाही.त्यामुळे शेतकऱ्यांची यंदाची दिवाळीही अंधारातच गेली आहे. 

 

आजचे सोयाबीनचे सविस्तर दर

बाजार समिती	जात/प्रत	परिमाण	आवक	कमीत कमी दर	जास्तीत जास्त दर	सर्वसाधारण दर
13/11/2023
चंद्रपूर	---	क्विंटल	115	4800	5035	4960
सिल्लोड	---	क्विंटल	40	4800	4900	4850
परभणी	लोकल	क्विंटल	645	4900	5050	5000
वरोरा	पिवळा	क्विंटल	285	3000	4900	4400
घणसावंगी	पिवळा	क्विंटल	210	4800	4900	4800

 

आजचे कापसाचे सविस्तर दर

बाजार समिती	जात/प्रत	परिमाण	आवक	कमीत कमी दर	जास्तीत जास्त दर	सर्वसाधारण दर
13/11/2023
उमरेड	लोकल	क्विंटल	44	6940	7050	7000
वरोरा	लोकल	क्विंटल	462	7000	7200	7100

 

आजचे कांद्याचे सविस्तर दर 

बाजार समिती	जात/प्रत	परिमाण	आवक	कमीत कमी दर	जास्तीत जास्त दर	सर्वसाधारण दर
13/11/2023
बारामती	लाल	क्विंटल	141	1500	4350	3500
जळगाव	लाल	क्विंटल	375	1575	4177	3200
पुणे	लोकल	क्विंटल	4308	2500	4600	3550
पुणे- खडकी	लोकल	क्विंटल	2	3500	3500	3500
पुणे -पिंपरी	लोकल	क्विंटल	1	4200	4200	4200
पुणे-मांजरी	लोकल	क्विंटल	69	2600	3600	3000
पुणे-मोशी	लोकल	क्विंटल	270	300	2500	1400
मंगळवेढा	लोकल	क्विंटल	83	700	4500	3600
कल्याण	नं. १	क्विंटल	3	4000	5500	5000
नाशिक	उन्हाळी	क्विंटल	516	3300	4511	4000