Nafed onion price: नाफेडचा भाव फुटल्यावर बाजारात कांदा वधारला, नाफेड आता दररोज भाव जाहीर करणार

Nafed Onion Price: नाफेडचे बाजारभाव जाहीर झाल्यानंतर लासलगाव बाजारात कांदा बाजार भाव वधारले आहेत. दरम्यान आता आठवड्याला नव्हे, तर दररोज नाफेडचे कांदा बाजारभाव जाहीर होणार आहेत.

Nafed onion price will declare on daily basis या आठवड्यात नाफेडने कांदा खरेदीचे आठवड्याचे बाजारभाव जाहीर करताच लासलगाव आणि पिंपळगाव बसवंत बाजारसमितीमध्ये कांद्याचे भाव वधारले असून त्याचा फायदा कांदा उत्पादक शेतकऱ्यांना होताना दिसत आहे.

गेल्या आठवड्यात लासलगाव बाजारसमितीत कांद्याला सरासरी २४०० रुपये ते २५०० रुपये प्रति क्विंटल बाजारभाव मिळत होते. पिंपळगाव बसवंत बाजारसमितीतही २५०० रुपयांच्या आसपास कांद्याचे बाजारभाव होते. त्याचवेळेस नाफेडचे खरेदी दर मात्र २१०० रुपयांच्या आसपास होते.

नाफेडचे दर हे दर आठवड्याला डोकामार्फत अर्थात केंद्रातील ग्राहक संरक्षण विभाग ठरविणाार होता. त्यानुसार या आठवड्याचे कांदा खरेदी दर रुपये २५५५ प्रति क्विंटल बकरी ईदच्या सुटीनंतर म्हणजेच मंगळवार दिनांक १८ जून रोजी जाहीर झालेत. हे दर जाहीर झाल्याबरोबर स्थानिक बाजारात व्यापाऱ्यांनीही कांद्याचे खरेदी दर वाढवले.

सध्या लासलगाव आणि पिंपळगाव बसवंत या महत्त्वाच्या बाजारसमित्यांमध्ये मागील तीन दिवसांपासून सरासरी ३ हजार ते ३१०० रुपये प्रति क्विंटल कांदा बाजारभाव आहेत. या संदर्भात नाफेडचे संचालक केदा नाना आहेर यांनी ‘लोकमत ॲग्रो’ला माहिती दिली की नाफेडच्या दरांचा स्थानिक कांदा बाजारभावांवर नेहमीच सकारात्मक परिणाम होत असतो. आतही नाफेडने दर जाहीर करताच स्थानिक बाजार समित्यांमध्ये कांदा खरेदी दर वाढला आहे. खरेदीदारांची संख्या जास्त असल्यानेही कांदा दर वाढल्याचे श्री. आहेर यांनी स्पष्ट केले.

नाफेड आणि एनसीसीएफच्या माध्यमातून कांदा खरेदी करणाऱ्या शेतकरी उत्पादक कंपन्यांच्या प्रतिनिधीने सांगितले की नाफेडने कांदा खरेदी दर वाढवले, तर स्थानिक बाजारातील कांदा खरेदीवर त्याचा परिणाम होत असतो. नाफेडच्या वाढलेल्या दरानंतर लासलगाव, पिंपळगाव बाजारसमितीत कांदा बाजारभाव वाढल्याचे यापूर्वीही घडलेले आहे. ही शेतकऱ्यांसाठी चांगली बाब आहे.

नाफेडचा भाव दररोज जाहीर होणारमागील आठवड्यापासून डोकामार्फत नाफेडचे बाजारभाव जाहीर होत आहेत. सुरूवातीला हे बाजारभाव दर आठवड्याला जाहीर होणार असे सांगण्यात येत होते. त्यानुसार या आठवड्यात कांदा बाजारभाव जाहीरही झाले. मात्र आजपासून या नियमात केला जात असून आता नाफेड कांदा खरेदीचे भाव दररोज जाहीर होणार आहेत. नाफेडचे संचालन केदानाना आहेर यांनी ‘लोकमत ॲग्रो’ला ही माहिती दिली. येणाऱ्या काळात बाजारसमित्यांच्या आवारातच नाफेडची कांदा खरेदी केंद्रे सुरू करण्याचा प्रयत्न असल्याचेही त्यांनी बोलून दाखविले.

नाफेडचे बाजारभाव जाहीर झाल्यानंतर जर बाजारात कांद्याचे भाव वाढत असतील, तर याचा अर्थ स्पष्ट आहे की बाजारात कांद्याची उपलब्धता कमी आहे. बाजारात आवक वाढते आणि जेव्हा कांद्याचे बाजारभाव पडतात, खरं तर त्यावेळेस नाफेडने चांगला दर देऊन शेतकऱ्यांचा कांदा खरेदी करून साठवला पाहिजे, पण सध्या तसे होताना दिसत नाहीये.- विजय जावंधिया, शेतकरी नेते व कृषी अर्थशास्त्राचे अभ्यासक

आजचे कांदा बाजारभाव असे आहेत...

बाजार समिती	जात/प्रत	आवक	कमीत कमी दर	जास्तीत जास्त दर	सर्वसाधारण दर
20/06/2024
कोल्हापूर	---	5037	1000	3200	2200
अकोला	---	405	2200	3000	2500
छत्रपती संभाजीनगर	---	7314	1150	2600	1875
खेड-चाकण	---	200	2000	3000	2500
सातारा	---	235	2500	3000	2750
नागपूर	लाल	3000	2500	3300	3100
भुसावळ	लाल	9	2200	3000	2500
पुणे	लोकल	11154	1000	3200	2100
पुणे -पिंपरी	लोकल	12	1900	2800	2350
पुणे-मोशी	लोकल	801	1500	3000	2250
मलकापूर	लोकल	280	1500	3000	2225
मंगळवेढा	लोकल	33	2500	3100	2500
कामठी	लोकल	54	3000	4000	3500
कल्याण	नं. १	3	2400	3200	2800
नागपूर	पांढरा	2040	2700	3300	3150
हिंगणा	पांढरा	1	2790	2790	2790
येवला	उन्हाळी	8000	1000	3161	2800
लासलगाव	उन्हाळी	11271	1100	3251	3051
लासलगाव - विंचूर	उन्हाळी	12200	1200	3300	3050
मालेगाव-मुंगसे	उन्हाळी	8000	1800	3211	2900
सिन्नर - नायगाव	उन्हाळी	375	1000	3144	2950
चांदवड	उन्हाळी	7200	1800	3861	2930
पिंपळगाव बसवंत	उन्हाळी	15400	1350	3500	3150
देवळा	उन्हाळी	6200	1500	3225	3000
नामपूर	उन्हाळी	4740	700	3500	3000
नामपूर- करंजाड	उन्हाळी	4200	2000	3800	3300