Gosikhurd Dam Storage : विदर्भातील धरणांचा पाणीसाठा वाढला, गोसीखुर्द धरणात किती पाणी आले? 

Gosikhurd Dam Storage : भंडारा जिल्ह्यात जोरदार पाऊस असून गोसीखुर्द धरणातही पाणीसाठा (Gosikhurd Dam) उपलब्ध झाला आहे.

Vidarbha Dam Storage : राज्यातील काही जिल्ह्यात मुसळधार पाऊस (Heavy Rain) सुरु असून भंडारा जिल्ह्यात पावसाने जोरदार हजेरी लावली. जिल्हाभर झालेल्या पावसामुळे अनेक नद्या नाल्यांना पूर आला असून गोसीखुर्द धरणातही ३२.०५ टक्के पाणीसाठा  (Gosikhurd Dam) उपलब्ध झाला आहे. तर पाणीपातळी नियंत्रित करण्यासाठी गोसीखुर्द धरणाचे ३३ पैकी १९ दरवाजे गुरुवारी अर्धा मीटरने उघडण्यात आले. या दरवाजांमधून २२१४.१२ क्युमेक पाणी सोडण्यात येत आहे.

भंडारा जिल्ह्यात (Bhandara District) बुधवारी अनेक ठिकाणी मुसळधार पाऊस झाल्याने नद्या व जलाशयांच्या पाणीपातळीत वाढ झाली आहे. दऱ्याखोऱ्यांमध्ये झालेल्या मुसळधार पावसामुळे भंडारा जिल्ह्यातून वाहणाऱ्या वैनगंगा नदी नदी आणि पवनीजवळील गोसीखुर्द पाटबंधारे प्रकल्पाच्या पाणीपातळीत वाढ झाली आहे. पाणीपातळी नियंत्रित करण्यासाठी गोसीखुर्द धरणाचे ३३ पैकी १९ दरवाजे गुरुवारी अर्धा मीटरने उघडण्यात आले. या दरवाजांमधून २२१४.१२ क्युमेक पाणी सोडण्यात येत आहे. त्यामुळे धरणाच्या पलीकडे असलेल्या वैनगंगा नदीच्या पाणीपातळीत वाढ होण्याची शक्यता आहे. गोसीखुर्द धरणाच्या पाणलोट क्षेत्रात झालेल्या मुसळधार पावसामुळे आणि धापेवाडा बॅरेजच्या पाच दरवाजांमधून गाळ काढण्यात आल्याने गोसीखुर्द धरणाच्या पाणीपातळीत वाढ झाली असल्याचे सूत्रांनी सांगितले. गुरुवारी गोसीखुर्द धरणाची पाणीपातळी ३२.०५ टक्के झाली आहे.

जिल्ह्यात कुठे किती पाऊस? 

भंडारा येथील पहेला मंडळात १२७.८ मि.मी., धरणगाव ११७, शहापूर १००.८, भंडारा ७७.३, खोकरला ७७.३. मोहाडी येथील वरठी मंडळांत ७४.५, पवनी येथील अड्याळ ८८.५, आसगाव ६६.८, सानगडी ६३.६३, लाखांदूर ७९.८, बारव्हा ७९ आणि पालांदूर विभागात ६५.५ मिमी पावसाची नोंद झाली आहे. दरम्यान, जिल्हा आपत्ती व्यवस्थापन विभागाच्या सूत्रांनुसार गत २४ तासांत जिल्ह्यातील भंडारा आणि पवनी या दोन तालुक्यांमध्ये अतिवृष्टीची नोंद झाली आहे. भंडारा येथे ९०.२ मिमी तर पवनी तालुक्यात ७०.७ मिमी पाऊस बरसला. साकोली तालुकामध्ये ६१.४ मिमी, लाखांदूर ५९.०, लाखनी ४६.१, मोहाडी ४०.१ मिमी पावसाची नोंद झाली आहे. तुमसर तालुक्यात सर्वात कमी ९.३ मिमी पाऊस झाला. त्याची सरासरी ५३.४ मिमी नोंदवली गेली.

नागपूर विभागातील धरण पाणीसाठा गोसीखुर्द (ऊ) : ७.७५३ TMC/२९.६६ टक्के  तोत.डोह (ऊ) : २१.२०९ TMC/५९.०६ टक्के  खडकपुर्णा (ऊ) ०.००० टीएमसी/००.०० टक्के  काटेपुर्णा (ऊ) ०.९०१ TMC/२९.५६ टक्के  उर्ध्व वर्धा:(ऊ) ९.४४७ TMC/४७.४२ टक्के 

हवामान खात्याचा रेड अलर्टभंडारा जिल्ह्यात गुरुवारीही पाऊस सुरूच होता. या काळात भंडारा शहरासह अनेक ठिकाणी अधूनमधून पाऊस झाला. या सूत्रांनी सांगितले की, मुसळधार पावसाची शक्यता पाहता हवामान खात्याने शुक्रवारी रेड अलर्ट जारी केला आहे. या काळात जिल्ह्यात बहुतांश ठिकाणी मुसळधार पाऊस पडण्याची शक्यता आहे. लोकांना सतर्क राहण्याचे आवाहन केले आहे.