भरधाव डंपरच्या धडकेने मुलीचा मृत्यू, वडील जखमी

टाकळी ढोकेश्वर : कान्हूर पठारकडून टाकळी ढोकेश्वरकडे (ता. पारनेर) भरधाव जाणाऱ्या डंपरने दुचाकीला दिलेल्या धडकेत एका मुलीचा मृत्यू झाला, तर वडील गंभीर जखमी झाले. शनिवारी (दि. ३१) दुपारी एकच्या सुमारास ही घटना घडली.

संपदा सुरेश साळवे (वय २५, रा. कान्हूर पठार) असे मृत्यू झालेल्या मुलीचे नाव आहे. वडील सुरेश रतन साळवे (रा. कान्हूर पठार) हे गंभीर जखमी झाले.

शनिवारी दुपारी संपदा साळवे, सुरेश साळवे हे दुचाकीवरून टाकळी ढोकेश्वरहून कान्हूर पठारच्या दिशेने चालले होते. त्याचवेळी भरधाव डंपर कान्हूर पठारहून टाकळी ढोकेश्वरच्या दिशेने येत होता. कान्हूर पठार येथील घाटात डंपरने समोरून येणाऱ्या दुचाकीला उडविले. यामध्ये संपदाचा जागीच मृत्यू झाला. वडील गंभीर जखमी झाले. त्यांना नगर येथील रुग्णालयात दाखल करण्यात आले आहे.

डंपरची धडक एवढी जोराची होती की, दुचाकीचा चक्काचूर झाला. धडकेनंतर वाहनाच्या पुढून घुसलेली दुचाकी डंपरच्या मागील चाकांमध्ये जाऊन अडकली होती. घटनेची माहिती मिळताच पोलीस उपनिरीक्षक उगले, विजयकुमार बोत्रे, जावळे, अशोक रोकडे, शिवाजी कडूस, आदी घटनास्थळी आले. अपघातानंतर डंपरचालक पसार झाला. मृतांच्या वारसाला तातडीने मदत मिळावी तसेच अवैध वाळू वाहतूक तातडीने बंद करण्याची मागणी ग्रामस्थांनी केली आहे.

----

३१ कान्हूर पठार

कान्हूर पठार घाटात डंपर-दुचाकीचा झालेला अपघात.