जिल्ह्याची रुग्णसंख्या एक हजाराच्या खाली

अहमदनगर : दुसऱ्या लाटेत जिल्ह्यातील दैनंदिन रुग्णसंख्या प्रथमच एक हजारांच्या खाली आली आहे. जिल्ह्यात सोमवारी फक्त ९१२ रुग्ण कोरोनाबाधित झाले. गत आठवडाभराचा जिल्ह्याचा पॉझिटिव्ह रेट हा ९.४६ टक्के इतका खाली आला असून त्यामुळे प्रशासन व नागरिकांचाही जीव भांड्यात पडला आहे.

गत आठवड्यातील एकूण चाचण्यांपैकी पॉझिटिव्ह येण्याचे प्रमाण हे ८.४६ टक्के इतके असल्याचे जिल्हा आरोग्य यंत्रणेने सांगितले. सोमवारी दुपारी संपलेल्या २४ तासांत १८ हजार ४०० इतक्या चाचण्या झाल्या होत्या, त्यापैकी फक्त ९१२ जण पॉझिटिव्ह आढळून आले आहेत. त्यामुळे एका दिवसाचा पॉझिटिव्ह रेट हा ४.८५ टक्के इतका कमी झाला आहे. गत महिन्यात तो ४२ टक्क्यांपर्यंत होता.

जिल्ह्यात सोमवारी १,८४६ रुग्णांना रुग्णालयातून घरी सोडण्यात आले. आता बरे झालेल्या रुग्णांची एकूण संख्या २ लाख ४८ हजार ३३ इतकी झाली आहे. रुग्ण बरे होण्याचे जिल्ह्यातील प्रमाण हे आता ९४.६२ टक्के इतके झाले आहे. रुग्णसंख्येत ९१२ ने वाढ झाल्याने उपचार सुरू असणाऱ्या रुग्णांची संख्याही कमी झाली असून, ती आता १० हजार ८८४ इतकी झाली आहे.

जिल्हा रुग्णालयाच्या कोरोना टेस्ट लॅबमध्ये २२३, खासगी प्रयोगशाळेत केलेल्या तपासणीत ३५९ आणि अँटिजन चाचणीत ३३० रुग्ण बाधित आढळले. त्यामध्ये अहमदनगर (४५), राहाता (४२), संगमनेर (१३७), श्रीरामपूर (७०), नेवासे (८१), नगर तालुका (६३), पाथर्डी (३९), अकोले (५७), कोपरगाव (२६), कर्जत (२६), पारनेर (५९), राहुरी (४०), भिंगार (२), शेवगाव (७८), जामखेड (४९), श्रीगोंदा (५५), इतर दिल्हा (१२), इतर राज्य (३२) असे एकूण ९१२ रुग्ण आढळून आले. दरम्यान, २४ तासांत ४५ जणांचा मृत्यू झाल्याची माहिती आरोग्य यंत्रणेने दिली आहे.

---

कोरोना स्थिती

बरे झालेली रुग्णसंख्या :२,४८,०३३

उपचार सुरू असलेले रुग्ण : १०,८८४

मृत्यू : ३,२१८

एकूण रुग्णसंख्या:२,६२,१३५