नाशिक-पुणे महामार्गावर ट्रॅक्टर-पिकअपचा अपघात, एक ठार

अपघातात तीन जण जखमी, ट्रॅक्टरचे दोन तुकडे

रामप्रसाद चांदघोडे, लोकमत न्यूज नेटवर्क, घारगाव (संगमनेर): पिकअपने ट्रॅक्टरला पाठीमागून जोराची धडक दिल्याने झालेल्या भीषण अपघातात ट्रॅक्टर चालक जागीच ठार झाला. हा अपघात गुरुवारी सकाळी ( दि.१३) नाशिक-पुणे महामार्गावर संगमनेर तालुक्यातील डोळासणे शिवरात घडला. यात रस्त्याने पायी जाणारे  तीन शाळकरी मुलेही जखमी झाले आहेत.

संतोष नारायण शिंदे (वय-४२ रा. उंब्रज नंबर १,ता.जुन्नर, जि.पुणे) असे अपघातात मृत्यू झालेल्या ट्रॅक्टर चालकाचे नाव आहे. याबाबत डोळासणे महामार्ग पोलिसांनी दिलेली माहिती अशी,  संतोष शिंदे हे ट्रॅक्टर घेऊन आळेफाटा मार्गे संगमनेरच्या दिशेने जात होते. गुरूवारी सकाळी पुणे-नाशिक राष्ट्रीय महामार्गावरील डोळासणे शिवारात आले असता त्याच दरम्यान पाठीमागून भरधाव वेगात येणाऱ्या पिकअपने ट्रॅक्टरला जोराची धडक दिली. झालेल्या भीषण अपघातात ट्रॅक्टर चालक शिंदे हे जागीच ठार झाले. दरम्यान, संबंधित ठिकाणाहून पायी जाणार्‍या तीन शाळकरी मुलांनाही धडक बसली. यात डोळासणे परिसरातील अनुराग बाबाजी गोडे, अपेक्षा दत्तात्रय गोडे, राणी लहु लोहकरे हे तिघेही जखमी झाले आहे.

अपघाताची माहिती समजताच परिसरातील ग्रामस्थांनी  अपघातस्थळी धाव घेतली. खासगी रुग्णवाहिकेतून जखमी मुलांना संगमनेर येथील खासगी रुग्णालयात औषधोपचारासाठी दाखल करण्यात आले. डोळासणे महामार्गाचे सहायक पोलीस निरीक्षक सचिन सुर्यवंशी, पोलीस हवालदार पंढरीनाथ पुजारी, भरत गांजवे यांनीही घटनास्थळी धाव घेतली. टोलनाक्याचे कर्मचारीही क्रेन घेऊन घटनास्थळी दाखल झाले. क्रेनच्या माध्यमातून अपघातग्रस्त ट्रॅक्टर महामार्गावरून बाजूला काढण्यात आला. दरम्यान, पिकअप चालक फरार झाला.