बाळापुरात ट्रकच्या धक्क्याने बसचे नुकसान

बसचालकाच्या प्रसंगावधानामुळे भीषण अपघात टळला.

बाळापूर (जि.अकोला), दि. २८: बाळापूर येथील मन नदीवरील पुलावरून २९ ऑगस्ट रोजी सकाळी जाणार्‍या एका एस.टी. बसला विरुद्ध दिशेने राँग साइडने येणार्‍या ट्रकने धडक दिल्याने बसचे तीन हजार रुपयांचे नुकसान झाले. या अपघाताबाबत सदर बसचालकाने दाखल केलेल्या तक्रारीवरून ट्रकचालकाविरुद्ध पोलिसांनी गुन्हा दाखल केला आहे. या धडकीमुळे बस पुलावरून खाली कोसळून भीषण अपघात झाला असता; परंतु प्रवाशांच्या सुदैवाने व बसचालकाच्या प्रसंगावधानामुळे तो टळला.
मलकापूर येथून अमरावतीकडे जाणार्‍या एम.एच.४0 वाय ५४८१ क्रमांकाची एस.टी. बस रविवारी सकाळी मन नदीवरील पुलावरून जात असताना त्याचवेळी विरुद्ध दिशेने राँग साइडने येणार्‍या एम.एच.२८ बी.८३२५ क्रमांकाच्या ट्रकने तिला जोरदार धडक दिली. त्यामुळे बसचालकाच्या बाजूच्या खिडक्यांच्या काचा फुटल्या व बसचे तीन हजार रुपयांचे नुकसान झाले. या अपघाताबाबत बसचालक उमेश अशोक पवार यांनी बाळापूर पोलीस स्टेशनमध्ये दाखल केलेल्या तक्रारीवरून बाळापूर पोलिसांनी सदर ट्रकचालकाविरुद्ध विविध कलमान्वये गुन्हा दाखल केला आहे. येथील मन नदीवर एक जुना व एक नवा असे दोन पूल आहेत. परंतु, तरीही रॉंग साइडने वाहने चालविण्याचे प्रकार सुरूच आहेत.