अभियांत्रिकी, तांत्रिकी पदवी उन्हाळी परीक्षांचे स्वीकारणार ऑनलाईन अर्ज

अमरावती : संत गाडगेबाबा अमरावती विद्यापीठाशी संलग्न महाविद्यालयांतील अभियांत्रिकी व तांत्रिकी अभ्यासक्रमांच्या पदवी परीक्षा उन्हाळी-२०२१ करिता १ ते ६ जून या कालावधीत ऑनलाईन अर्ज स्वीकारले जाणार आहेत. यात नियमित व माजी विद्यार्थ्यांना संधी असल्याची माहिती विद्यापीठाने दिली.

कोरोना संसर्गामुळे महाविद्यालये बंद असली तरी ऑनलाईन शिक्षण, परीक्षांचे निरंतर नियोजन महाविद्यालये, विद्यापीठातून होत आहे. त्यानुसार बी.ई, बी.टेक, बी.टेक्स्ट. सत्र ४ ते ८ आणि बी.आर्क. सत्र ३ ते १० चे सर्व नियमित व माजी विद्यार्थ्यांना उन्हाळी परीक्षा-२०२१ चे ऑनलाईन अर्ज सादर करता येणार आहे. ऑनलाईन परीक्षा अर्ज संबंधित महाविद्यालयांनी त्यांच्या लॉगइनद्वारे पडताळणी करून अर्ज सादर करणाऱ्या विद्यार्थ्यांची यादी आवश्यक शुल्कासह विद्यापीठाकडे सादर करावी लागेल, असे परीक्षा व मूल्यांकन मंडळाचे संचालक हेमंत देशमुख यांनी दिली.