परतवाड्यातील कापड व्यावसायिकाच्या मुलाची आत्महत्या

गणेश मंदिराच्या चॅनल गेटवर घेतला गळफास

परतवाडा : स्थानिक कापड व्यावसायिक व संस्कृती शोरुमचे संचालक अशोक जिवतानी यांचा २७ वर्षीय मुलगा ललित जिवतानी याने फॉरेस्ट डेपोमागील गणेश मंदिराच्या चॅनल गेटला गळफास घेऊन आत्महत्या केली. ही घटना २० मार्च रोजी पहाटे ६ वाजतादरम्यान घडली.

१९ मार्चला मध्यरात्रीनंतर २ ते २.३० वाजता दरम्यान ललित वाहनाने घराबाहेर पडला. त्याच्या आईने भ्रमणध्वनीवरून त्याला विचारणा केली तेव्हा त्याने पहाटे ५ वाजेपर्यंत परत येत असल्याचे सांगितले. पण तो परतलाच नाही. त्याच्या आत्महत्येची वार्ताच जिवतानी परिवारात पोहचली. एक दीड वर्षांपूर्वीच त्याचा विवाह झाला असून, त्याला सहा महिन्यांची मुलगी आहे. घटनास्थळाहून मृताच्या खिशातून एक चिठ्ठीही पोलिसांनी हस्तगत केली. मानसिक तणावात आत्महत्या करीत आहे. मम्मी-पापा माफ करा, असे त्या चिठ्ठीत नमूद केल्याचे पोलीससूत्रांनी सांगितले.

घटनेच्या अनुषंगाने परतवाडा पोलिसांनी मर्ग दाखल केला. गणपतीच्या साक्षीने गणपती मंदिराच्या चॅनल गेटलाच गळफास घेण्याची ही शहरातीलच नव्हे तर परिसरातील पहिलीच घटना आहे.

------