दादाहरी वडगाव बचावसाठी ग्रामस्थ रस्त्यावर

प्रदूषणाविरुद्ध दिला नारा : शुक्रवारी रास्ता रोको आंदोलन, थर्मल अधिकाऱ्यांविषयी असंतोष

लोकमत न्यूज नेटवर्क

परळी : येथील औष्णिक विद्युत केंद्राच्या दादाहरी वडगाव व दाऊतपूर शिवारातील तळ्यामधील राख व राखसाठ्याच्या प्रदूषणामुळे ग्रामस्थांच्या आरोग्यावर गंभीर परिणाम होत आहे. त्यामुळे आता प्रदूषण हटाव आणि दादाहरी वडगाव बचाव या मागणीसाठी ग्रामस्थांनी रास्ता रोको आंदोलन करण्याचा इशारा दिला आहे.

परळी तालुक्यातील दादाहरी वडगाव, दाऊतपूर शिवारात थर्मलचे राख तळे असून, या तळ्यातून दररोज शेकडो टिप्पर भरून राखेची वाहतूक केली जात आहे. ही वाहतूक परळी-गंगाखेड रस्त्यावरील दुचाकीसह सर्वच वाहन चालकांसाठी जीवघेणी ठरत आहे. विशेष म्हणजे दादाहरी वडगाव येथील साडेतीन हजार ग्रामस्थांना राखेच्या प्रदूषणाचा गेल्या अनेक वर्षांपासून त्रास होत आहे. ग्रामस्थांना डोळ्यांचे व फुफ्फुसाचे आजार होत आहेत. गेल्या पाच वर्षात श्वसनाचे गंभीर आजार जडलेले रुग्ण वाढले आहेत.

परळी विद्युत केंद्राच्या मुख्य अभियंत्याकडून कसलीही ठोस कारवाई केली जात नसल्याने राखेची परळी व परिसरातून वाहतूक सुरूच आहे. राख तळ्यातून होणारी राखेची वाहतूक बंद करावी व दादाहरी वडगाव, दाऊतपूर शिवारातील राखेचे साठे नष्ट करावेत आणि प्रदूषणमुक्त गाव करावे, या मागणीसाठी १२ फेब्रुवारी रोजी परळी-गंगाखेड रस्त्यावरील दादाहरी वडगावजवळ रस्ता रोको आंदोलन करण्यात येणार आहे. बुधवारी ग्रामस्थांनी नायब तहसीलदार बाबूराव रुपनर यांची भेट घेऊन निवेदनाद्वारे तसा इशारा दिला आहे.

दादाहरी वडगावचे ग्रामस्थ राखेच्या प्रदूषणामुळे त्रस्त झाले आहेत. ग्रामस्थांना प्रदूषणाचा त्रास होत आहे. आरोग्यावरही परिणाम होत आहे. परंतु, या भागातील लोकप्रतिनिधी व औष्णिक विद्युत केंद्राचे अधिकारी याकडे अजिबात लक्ष देत नाहीत. त्यामुळे ग्रामस्थांमध्ये असंतोष निर्माण झाला आहे.

- शिवाजी शिंदे, माजी सरपंच, दादाहरी वडगाव.

औष्णिक विद्युत केंद्राच्या राख प्रदूषणामुळे व सिमेंट कंपनीमुळे परळी शहर व परिसरातील नागरिकांच्या शरिरावर तर परिणाम होतच आहे. शिवाय मुखरोग, छातीचे विकार होत आहेत. महिलांनाही प्रदूषणाचा त्रास होत आहे. या प्रश्नी राख प्रदूषण नियंत्रण समितीने सुरू केलेल्या चळवळीत प्रत्येक नागरिकांने सहभागी व्हावे.

- डॉ. मनोज मुंडे, दंत चिकित्सक

परळी तालुक्यातील दाऊतपूर, वडगाव येथून वाहतूक होणाऱ्या राखेच्या वाहनांवर तीन दिवसांपासून कारवाई करण्यात येत आहे. ज्याठिकाणी राख साठे असतील ते साठे उद्ध्वस्त करून संबंधितांवर गुन्हे नोंदविण्यात येतील.

- शिवलाल पुरभे, पोलीस निरीक्षक, परळी ग्रामीण

राखेच्या प्रदूषणासंदर्भात परळी विद्युत केंद्र व ग्रामीण पोलिसांना सूचना देण्यात आलेल्या आहेत. त्यादृष्टीने कार्यवाही सुरू आहे.

-

बाबूराव रुपनर, नायब तहसीलदार, परळी