राष्ट्रीय महामार्ग बनला ट्रान्सपोर्ट हब

तुमसर : खापा-देव्हाडी मार्गावर खापा शिवारात राष्ट्रीय महामार्गावर जडवाहनांच्या रांगा लागत असल्याने रस्त्यावरच ट्रान्सपोर्ट हबचा प्रत्यय येथे येत आहे. वाहनांच्या रांगांमुळे अपघाताची शक्यता नाकारता येत नाही, याकडे वाहतूक विभागाचे दुर्लक्ष दिसत आहे.

मनसर-गोंदिया राष्ट्रीय महामार्गावर खापा येथे ट्रक टिप्पर जडवाहतूक करणारी वाहने थेट रस्त्यावर उभी केली जातात. यामुळे वाहतुकीलाही खोळंबा होतो. अपघाताला आमंत्रण देणारे दृश्य नेहमीच दिसते. रात्रीच्या सुमारास रस्त्याशेजारी प्रचंड वाहनांच्या रांगा येथे लागून असतात. त्यामुळे वाहनधारकांचा जीव धोक्यात आला आहे. संबंधित विभागाचे येथे सतत दुर्लक्ष दिसत आहे. नव्याने रस्ता बांधकाम करण्यात आले आहे. रस्त्यावर थेट वाहने उभी केल्याने वाहतुकीस अडथळा निर्माण होतो. रात्री सदर वाहने भोजन व नास्त्याकरिता येथे थांबतात. परंतु, वाहनांची व्यवस्था इतरत्र करण्याची गरज आहे. थेट रस्त्यावर वाहने उभी करण्यास येथे कोणीही मनाई करत नाही. या रस्त्यावरून मोठ्या प्रमाणावर वाहतूक सुरू असते. मोकळ्या जागेत येथे वाहने उभी करण्याची गरज आहे. पर्यायी व्यवस्था येथे नसल्याने वाहन चालक थेट रस्त्यावरच वाहने उभी करतात.