कोविड केअर सेंटरमधील स्मोक अलार्म वाजला अन् एकच धावपळ

भंडारा जिल्हा सामान्य रुग्णालयातील अग्नितांडवाची घटना ताजी असताना शनिवारी सायंकाळी सहा वाजण्याच्या सुमारास कोविड केअर सेंटरमधील स्मोक अलार्म वाजायला लागला. आग लागल्याची ही सूचना बघता सर्वांची एकच धावपळ उडाली. अग्निशमन दलासह पोलिसांना पाचारण करण्यात आले. काही वेळात खरा प्रकार उघडकीस आला. कोविड केअर सेंटर आणि सहकार्याच्या मधल्या मोकळ्या जागेत केरकचरा पेटविण्यात आला होता. मोठा भडका होईल म्हणून ही आग तेथे उपस्थितांनी विझविली. मात्र, मोठा धूर झाला आणि तो लगतच्या कोविड केअर सेंटरमध्ये पोहोचला. त्याठिकाणी असलेल्या स्मोक अलार्मने धोक्याचा इशारा दिला.

या घटनेची माहिती मिळताच जिल्हाधिकारी संदीप कदम, अपर पोलीस अधीक्षक अनिकेत भारती, शहरचे ठाणेदार लोकेश काणसे यांच्यासह पोलीस पथक घटनास्थळी दाखल झाले. तसेच भंडारा नगरपरिषदेचे अग्निशमन दलही तत्काळ रुग्णालयात पोहोचले. या घटनेने काही काळ गोंधळाचे वातावरण निर्माण झाले होते. रुग्ण आणि त्यांच्या नातेवाइकांत भीतीचे वातावरण पसरले होते.

भंडारा जिल्हा सामान्य रुग्णालयात ९ जानेवारीच्या पहाटे अग्नितांडव घडले होते. यात दहा निष्पाप बालकांचा बळी गेला होता. त्यानंतर रुग्णालयाच्या विविध विभागात स्मोक अलार्म लावण्यात आले होते. अचानक कोविड सेंटरमध्ये शिरलेल्या धुरामुळे हा गोंधळ उडाला.