अज्ञात वाहनाची दुचाकीला धडक; दोन ठार, एक जखमी

तळणी ते दाभाडी मार्गावरील घटना

नीलेश जोशी, बुलढाणा-मोताळा: अज्ञात वाहनाच्या धडकेत दुचाकीवरील दोघे जण ठार तर एक जण गंभीर जखमी झाल्याची घटना शुक्रवार २२ डिसेंबरच्या संध्याकाळी तळणी ते दाभाडी मार्गावर घडली. शेख रशीद शेख कालु व शेख अमीन शेख हनिफ (दोघे रा. माकोडी )अशी या अपघातामधील मृतकांची नावे आहेत.

मोताळा तालुक्यातील माकोडी येथील शेख रशीद शेख कालु, शेख अमीन शेख हनिफ व शेख सलीम शेख कालु हे तिघे जण एका दुचाकीद्वारे (क्रमांक एमएच-२८- बीएम-२१७३) या वाहनाने मलकापूरहुन माकोडी येथे घराकडे जात होते.

दरम्यान, तळणी - दाभाडी मार्गावरील खडकपूर्वा परिसरात अज्ञात वाहनाने त्यांच्या दुचाकीला जबर धडक दिली. या अपघातात शेख रशीद शेख कालु यांचा जागीच मृत्यु झाला तर, शेख अमीन शेख हनिफ व शेख सलीम शेख कालु हे दोघे जण गंभीर जखमी झाले. जखमींना तत्काळ उपचारासाठी मलकापूर येथील रुग्णालयात दाखल करण्यात आले. मात्र शेख अमीन शेख हनिफ यांचा उपचारादरम्यान मृत्यू झाला. जखमी शेख सलीम शेख कालु यांच्यावर उपचार सुरू आहेत. एका चारचाकी वाहनाने या दुचाकीला धडक दिली, अशी चर्चा घटनास्थळी होती.

अपघाताची माहिती मिळताच बोराखेडी पोलीस स्टेशनचे पीएसआय विजयकुमार घुले, पीएसआय अनिल भुसारी, पोलिस कॉन्स्टेबल सुनील थोरात, रामदास गायकवाड व सहकाऱ्यांनी घटनास्थळी धाव घेत जखमींना रुग्णालयात दाखल करण्यासोबतच मार्गावरील वाहतूक सुरळीत केली. या अपघातात दोघांचा दुर्दैवी मृत्यू झाल्याने माकोडी गावसह परिसरात शोककळा पसरली आहे. रुग्णालयासह घटनास्थळी नागरिकांची एकच गर्दी उसळली होती. वृत्त लिहेपर्यंत बोराखेडी पोलिसांची कार्यवाही सुरू होती.