बुलडाणा: खामगावात कुटुंबाला झोपेत पेटविण्याचा प्रयत्न!

खामगाव(बुलडाणा): स्थानिक रेखा प्लॉट भागातील एका कुटुंबाला पेटविण्याचा प्रयत्न उशिरा रात्री शहरात घडला. या घटनेमुळे शहरात खळबळ उडाली असून, आगीची आस लागून जाग आल्याने पुढील अनर्थ टळला.

ठळक मुद्देरेखा प्लॉट भागातील घटना पेट्रोल टाकून घर जाळले!

लोकमत न्यूज नेटवर्क

खामगाव(बुलडाणा): स्थानिक रेखा प्लॉट भागातील एका कुटुंबाला पेटविण्याचा प्रयत्न उशिरा रात्री शहरात घडला. या घटनेमुळे शहरात खळबळ उडाली असून, आगीची आस लागून जाग आल्याने पुढील अनर्थ टळला.
रेखा प्लॉट भागातील तुषार तुकाराम वखरे (३६) आपल्या कुटुंबीयांसोबत झोपले होते. दरम्यान, रात्री १ वाजताच्या सुमारास त्यांच्या घराच्या दरवाजाचा कडी कोंडा लावून कुलूप लावण्यात आले. त्यानंतर घरावर पेट्रोल टाकून त्यांचे घर जाळण्यात आले. कुणीतरी अज्ञात व्यक्तीने हा खोडसाळपणा केला असून, आगीत वखरे यांच्या घराच्या दरवाज्यासह घरातील लाकडी पलंग जळाला आहे. यामुळे वखरे यांचे तीन ते साडेतीन हजार रुपयांचे नुकसान झाले आहे. घर पेटविले त्यावेळी घरात तुषार वखरे यांच्यासह त्यांची पत्नी आणि अनुष्का व अनुज ही दोन मुले होती. या प्रकरणी वखरे यांनी शिवाजी नगर पोलिसात तक्रार दाखल केली आहे.

रेखा प्लॉट परिसरात दहशत!

काही दिवसांपूर्वी याच परिसरात वाहने पेटविण्यात आली होती. त्यानंतर आता परिसरात घर पेटविण्यात आले. त्यामुळे परिसरात चांगलीच दहशत पसरली आहे. गेल्या काही दिवसांपासून परिसरात दहशतीचे वातावरण असून, नागरिक भयभीत झाले आहेत. दोन गटाकडून नेहमीच काही नागरिक पिचल्या जात असून, दहशत निर्माण करण्याच्या उद्देशातूनच शनिवारचा प्रकार घडला. याप्रकरणी पोलिसांनी तक्रार चौकशीवर ठेवली आहे.