रस्त्यावर गाडी लावून धिंगाणा घालणे भोवले

आरोपी विजय सुखदेव पवार (५६, रा. दधम, ता. खामगाव) हे सध्या बिबी पोलीस स्टेशनला एएसआय पदावर कार्यरत आहेत. तर योगेश गोविंद राठोड (३८, रा. बिबी) आणि रामदास खुशालराव गावंडे (४५, रा. हत्ता) हे त्यांच्या ताब्यातील कार क्रमांक एम.एच. २८ -एएन ३६४१ ने वरील घटनास्थळी मुख्य रोड लगत असणाऱ्या कच्च्या रस्त्यावर आपल्या ताब्यातील वाहन लावून मुख्य रस्त्यावर येऊन येणाऱ्या-जाणाऱ्या वाहनधारकाना तसेच लोकांना हातवारे करून अडथळा निर्माण करीत होते. दारूच्या नशेत मुख्य रस्त्यावर उभे राहून मोठमोठ्याने आरडाओरडा करताना नागरिकांशी गैरवर्तन करीत असल्यामुळे वाहतूक दोन्ही बाजूने बऱ्याच वेळेसाठी ठप्प झाली होती. देऊळगाव राजा पोलिसांनी घटनास्थळ गाठून वाहतूक सुरळीत केली. या घटनेची फिर्याद पोलीस कॉन्स्टेबल माधव नारायण कुटे यांनी देऊळगाव राजा पोलीस स्टेशनला ६ सप्टेंबरला दिली. त्यानुसार उपरोक्त आरोपींविरुद्ध विविध कलमान्वये गुन्हा दाखल करण्यात आला असून, अधिक तपास पोलीस निरीक्षक जयवंत सातव यांच्या मार्गदर्शनाखाली पोलीस उपनिरीक्षक किरण खाडे करीत आहेत.