रुग्णालयांना ‘जनआरोग्य’चे वावडे, १.३२ टक्का रुग्णांनाच मोफत उपचार

जिल्ह्यात आजपर्यंत ७७ हजार ४४ कोरोनाबाधित रुग्ण सापडले असून, त्यापैकी शासकीय व खासगी मिळून १,०१९ जणांवरच उपचार करण्यात आले आहेत. खासगी रुग्णालयामध्ये तर केवळ १२ रुग्णांवर उपचार करण्यात आले आहेत. उर्वरित सर्व १,००७ रुग्णांवर शासकीय रुग्णालयांमध्ये उपचार करण्यात आले आहेत. त्यावर २ कोटी ३ लाख ८० हजार रुपयांचा खर्च झालेला आहे.

सहा रुग्णालयांना नोटीस

कोरोनाबाधित रुग्णांना महात्मा फुले जनआरोग्य योजनेंतर्गत उपचाराचा लाभ न दिल्याप्रकरणी जिल्हा प्रशासनाने सहा खासगी रुग्णालयांना नोटीस दिल्या आहेत. त्यासंदर्भात अद्याप संबंधित रुग्णालयांकडून त्याचे स्पष्टीकरण दिले गेलेले नाही.

एकूण २० पॅकेज उपलब्ध

कोरोनाबाधित रुग्णांसाठी जनआरोग्य योजनेंतर्गत एकूण २० पॅकेज उपलब्ध आहेत. प्रामुख्याने फुप्फुसाशी संबंधित (श्वसनाशी संबंधित) आजाराच्या पॅकेजचा यामध्ये समावेश आहे. पॅकेजअंतर्गत दहा दिवसांनंतरही रुग्ण बरा न झाल्यास त्या पॅकेजला मुदतवाढ देण्याची सुविधा आहे. त्यासाठी एक दिवसाच्या अंतराने पॅकेजचे नूतनीकरण करता येते.

आपत्कालीन सुविधाही

रुग्णाची गंभीर अवस्था असल्यास आपत्कालीन स्थितीत केवळ सूचनाही देऊनही योजनेंतर्गत रुग्णाला लाभ दिला जाऊ शकतो. त्यासाठी इर्मजन्सी टेलिफोनिक इंटिमेशनची सुविधा आहे. राज्य आरोग्य हमी सोसायटीमार्फत ती दिले जाते. खासगी रुग्णालयातून, लॅबमधून केलेल्या केविड चाचणीचा खर्चही योजनेतील पॅकेजमध्ये होत असल्यास व त्याची पूर्वपरवानगी मिळाल्यास कोविड चाचणीचाही खर्च पॅकेजमध्ये अंतर्भूत असतो.

३० जनआरोग्य मित्रांकडे करता येते नोंदणी

योजनेच्या लाभ देण्यासाठी जिल्ह्यात ३० जन आरोग्यमित्रांची मदत घेता येऊ शकते. प्रसंगी संबंधितांच्या व्हॉटस्‌ॲप ग्रुपवर रेशन कार्ड, आधार कार्ड, मतदान ओळखपत्र टाकल्यास योजनेमध्ये रुग्णाचा अंतर्भाव करण्यास हे आरोग्यमंत्री मदत करतात. दरम्यान, खासगी रुग्णालयांकडून काही अडचणी येत असल्यास योजनेचे जिल्हा समन्वयक आणि क्षेत्रीय व्यवस्थापक यांच्याकडे तक्रार किंवा संपर्क साधता येतो. जिल्हाधिकाऱ्यांकडेही ई-मेलद्वारे तक्रार करता येते.