मेहकर-औरंगाबाद मार्गावर खासगी बस व ट्रक अपघातात एक ठार 

ट्रक आणि खासगी प्रवासी बसची समोरासमोर धडक होऊन झालेल्या अपघातामध्ये एक जण ठार झाला तर दोन जण गंभीर जखमी झाले.

लोकमत न्यूज नेटवर्क
अंजनी खुर्द: मेहकर-औरंगाबाद मार्गावर अंजनी खुर्द गावानजीक ट्रक आणि खासगी प्रवासी बसची समोरासमोर धडक होऊन झालेल्या अपघातामध्ये एक जण ठार झाला तर दोन जण गंभीर जखमी झाले. हा अपघात नऊ आॅगस्ट रोजी पहाटे चार वाजेच्या सुमारास झाला.
अपघातामध्ये ठार झालेल्या व्यक्तीचे नाव मुदसिर अहमदर खान (३२, रा. आमकिन्ही, ता. मानोरा, जि. वाशिम) असे आहे. गंभीर जखमीमध्ये खासगी प्रवासी वाहतूक करणाऱ्या बसचा चालक अश्विन जाने आणि ट्रक चालक जुनेद आलम यांचा समावेश आहे. मेहकर-औरंगाबाद मार्गावर यवतमाळकडून औरंगाबादकडे जाणाºया एमएच-२९-एडब्ल्यू-१११ आणि पुणे येथून नागपूरकडे जाणारा ट्रक युपी-७७-एन-८२२५ यांची अंजनी बुद्रूकनजीक एका ढाब्याजवळ समोरा समोर धडक होऊन हा अपघात झाला होता.

रस्त्यावरील खड्डे चुकविण्याच्या नादात हा अपघात झाल्याचे सांगण्यात येत आहे. खासगी प्रवासी वाहतूक करणाºया बसमध्ये २७ प्रवाशी होते. दरम्यान पहाटेची वेळ असल्याने वाहनांचा वेगही अधिक होता. त्यामुळे दोन्ही चालकांचे वाहनावरील नियंत्रण सुटल्याने हा अपघात झाला असावा, असा कयास व्यक्त केला जात आहे. घटनेचा पुढील तपास पोलिस करीत आहे. अपघातातील मृत व्यक्तीचे पार्थिव हे मेहकर येथील रुग्णालयात शवविच्छेदनासाठी पाठविण्यात आले होते तर अन्य दोन गंभीर जखमींवर मेहकर येथीलच ग्रामीण रुग्णालयात उपचार करण्यात येत आहेत.
(वार्ताहर)