Free Credit Score Check : पर्सनल लोन पासून गृहकर्जापर्यंत सध्या बाजारात कर्जाचे अनेक प्रकार उपलब्ध आहेत. तुम्हालाही कधी ना कधी कर्जाची गरज आहे का? असं विचारणारा एखादा तरी फोन आलाच असेल. कर्ज मिळण्याची प्रक्रिया आता पूर्वीपेक्षा वेगवान आणि सुलभ झाली आहे. अगदी काही मिनिटांत तुमच्या खात्यात पैसे येतात. पण, यासाठी एक गोष्ट अनिवार्य आहे. तुमचा सीबील किंवा क्रेडिट स्कोअर. त्यामुळे तुम्हालाही कर्जासाठी अर्ज करायचा असेल तर आधी क्रेडिट स्कोअर तपासायला हवा. रिझर्व्ह बँक ऑफ इंडियाच्या अलीकडील नियमांमुळे तुम्ही तुमचा क्रेडिट स्कोअर विनामूल्य तपासू शकतात. आरबीआयच्या मार्गदर्शक तत्त्वांनुसार, प्रत्येक व्यक्तीला वार्षिक मोफत क्रेडिट रिपोर्ट मिळवण्याचा अधिकार आहे.
क्रेडिट स्कोअर हा एक तीन अंकी नंबर आहे, जो तुमच्या क्रेडिट इतिहास दर्शवतो. क्रेडिट स्कोअरचा उपयोग बँका, पतसंस्था आणि इतर वित्तीय संस्था कर्जासाठी अर्ज करणाऱ्या व्यक्तीची पत योग्यता तपासण्यासाठी करतात. क्रेडिट स्कोअर ३०० ते ९०० पर्यंत असू शकतो. ७५० किंवा त्याहून अधिक क्रेडिट स्कोअर चांगला मानला जातो. चांगले सीबील किंवा क्रेडिट स्कोअर असलेले लोक कमी व्याजदरात कर्ज मिळवू शकतात. याशिवाय तुम्हाला कमी व्याजदरात क्रेडिट कार्डही मिळू शकते.
वाचा - UPI च्या नियमांमध्ये बदल; काय आहे बँकांच्या मिनिमम बॅलन्सचा नियम, जाणून घ्या महत्त्वाची माहिती
क्रेडिट रिपोर्ट मोफत कसे डाउनलोड करावे?
- सर्वप्रथम तुम्हाला मान्यताप्राप्त क्रेडिट ब्युरोच्या अधिकृत वेबसाइटवर जावे लागेल. CIBIL, Equifax, CRIF High Mark आणि Experian हे देशातील काही प्रमुख क्रेडिट ब्युरो आहेत.
- तुमचा क्रेडिट स्कोअर तपासण्यापूर्वी तुम्हाला अधिकृत वेबसाइटवर साइन अप करावे लागेल. यासाठी तुम्हाला तुमचे नाव, पत्ता, मोबाईल नंबर, ईमेल पत्ता, पॅन किंवा आधार कार्ड सारखी माहिती द्यावी लागेल.
- ऑथेंटिकेशनसाठी, जन्मतारीख, पत्ता, रोजगार तपशील, मागील नोकरीचा इतिहास आणि राजीनामा तपशील (विचारल्यास) यासारखी माहिती भरावी लागेल.
- अंतिम पडताळणीसाठी, तुम्हाला कागदपत्रे अपलोड करावे लागतील आणि सुरक्षा प्रश्नांची उत्तरे द्यावी लागतील. एकदा ते प्रमाणित झाल्यानंतर, तुम्हाला तुमच्या वैयक्तिक क्रेडिट रिपोर्ट पाहायला मिळेल.
- तुम्ही त्याची सॉफ्ट कॉपी डाउनलोड करू शकता.