HDFC Bank Loan : ऐन सणासुदीत एचडीएफसीबँकेने ग्राहकांना झटका दिला आहे. एकीकडे भारतीय रिझर्व्ह बँकेचे गव्हर्नर शक्तीकांत दास यांच्या नेतृत्वाखाली चलनविषयक धोरण समितीची बैठक आजपासून सुरू झाली आहे. ही बैठक ९ ऑक्टोबर रोजी संपणार आहे. अशा परिस्थितीत चलनविषयक धोरण समितीच्या निर्णयाकडे सर्वांचे लक्ष लागले आहे. अमेरिकन फेडरल रिझर्व्हने व्याजदरात कपात केल्यानंतर भारतातही रेपो दरात कपात होण्याची आशा लोकांना आहे. पण आरबीआयकडून दिलासा मिळण्यापूर्वीच एचडीएफसी बँकेने कर्जदरात वाढ करण्याची घोषणा केली आहे.
सामान्यांच्या खिशाचा भार वाढणार
एचडीएफसी ही देशातील खाजगी क्षेत्रातील आघाडीची बँक आहे. मात्र, या बँकेने ग्राहकांना मोठा धक्का दिला आहे. एचडीएफसी बँकेने २ कालावधीसाठी निधी-आधारित कर्ज दर (MCLR) 5 बेस पॉइंट्स (bps) पर्यंत वाढवले आहेत. त्यामुळे HDFC बँकेचे MCLR व्याजदर आता ९.१०% ते ९.४५% दरम्यान असतील. नवीन दर आजपासून म्हणजेच ७ ऑक्टोबर २०२४ पासून लागू झाले आहेत. मार्जिनल कॉस्ट ऑफ फंड बेस्ड लेंडिंग रेट (MCLR) हा किमान व्याज दर आहे. ज्यावर बँक किंवा सावकार कर्ज देऊ शकतात. हा एक बेंचमार्क व्याज दर आहे, जो रिझर्व्ह बँक ऑफ इंडिया (RBI) द्वारे ठरवला जातो.
पुनरावृत्तीनंतर कर्जावरील व्याजदर
HDFC बँकेने ६ महिने आणि ३ वर्षांच्या कालावधीच्या कर्जासाठी व्याजदर ५bps ने वाढवले आहेत. याशिवाय इतर मुदतीच्या कर्जावरील व्याजदर कायम राहतील. दुरुस्तीनंतर, एका रात्रीसाठी व्याज दर ९.१०% आणि एका महिन्यासाठी ९.१५% झाला आहे. 3 महिन्यांच्या कालावधीसाठी MCLR ९.४०% वरून ९.४५% आणि ६ महिन्यांच्या कार्यकाळासाठी ९.३०% करण्यात आला आहे. एक वर्षाचा MCLR, जो अनेक ग्राहकांना लागू आहे, तो ९.४५% आहे. तर दोन वर्षांसाठी MCLR ९.४५% आणि तीन वर्षांच्या कालावधीसाठी ९.४५% वरून ९.५०% करण्यात आला आहे.
आरबीआयकडून आशा
भारतीय रिझर्व्ह बँकेचे गव्हर्नर शक्तीकांत दास यांच्या अध्यक्षतेखाली चलनविषयक धोरण समितीची बैठक आजपासून सुरू झाली आहे. अनेक विकसित देशांनी आपल्या व्याजदरात कपात केली आहे. अशा परिस्थितीत आरबीआय काय निर्णय घेते? याकडे सर्वांचे लक्ष लागलं आहे. शेजारी राष्ट्र चीनने व्याजदरात कपात केल्यानंतर तेथील अर्थव्यवस्थेला चालना मिळाल्याचे पाहायला मिळत आहे.