-सुहास शेलारमुंबई : केवळ एका प्रवाशाला घेऊन ३६० सीटर विमाने दुबईच्या दिशेने रवाना होत असल्याचे प्रकार गेल्या काही दिवसांपासून समोर येत आहेत. अशावेळी फेऱ्या रद्द करण्याऐवजी विमान कंपन्या तोटा का सहन करत असतील, असा प्रश्न सामान्यांना पडणे स्वाभाविक आहे. याचे उत्तर असे की, दुबईला गेलेली ही विमाने परतताना वंदे भारत अभियानांतर्गत प्रवासी घेऊन येत असल्याने त्यातून तूट भरून निघते, अशी माहिती सूत्रांनी दिली.१९ मे रोजी ३६० सीटर, तर २२ मे रोजी २५६ सीटर विमानाने एकमेव प्रवाशासह दुबईसाठी उड्डाण केले. हा प्रवास अडीच ते तीन तासांचा असून, त्यासाठी जवळपास १७ टन इंधन खर्च होते. त्याचे बाजारमूल्य ८ लाख रुपये आहे. कोरोनामुळे हवाई क्षेत्र तोट्यात असताना एका प्रवाशासाठी इतका खर्च विमान कंपनीला परवडतो कसा, असा प्रश्न उपस्थित होऊ लागल्याने ‘लोकमत’ने त्याचा मागोवा घेतला.मुंबईतून विमाने रिकामी जात असली, तरी दुबईहून परतताना सीट फुल्ल असतात. वंदे भारत अभियानांतर्गत या विशेष फेऱ्यांचे नियोजन केले जाते. त्याचे भाडेही इतर फेऱ्यांच्या तुलनेत अधिक असते. आंतरराष्ट्रीय प्रवासी विमानांवरील निर्बंध भारताने वाढविल्याने ‘वंदे भारत’शिवाय प्रवाशांकडे अन्य पर्याय नाही. त्यांना चढ्या दरात तिकीट घ्यावे लागते. त्यामुळे आपोआपच रिकाम्या फेरीचा खर्चही यातून वसूल होतो.संयुक्त अरब अमिरतीने (यूएई) भारतीय प्रवाशांच्या आगमनावर बंदी घातली असली, तरी तेथून भारतात येणाऱ्यांवर निर्बंध नाहीत. शिवाय एअर इंडिया, अमिरात एअरलाईन या दोनच विमान कंपन्या पूर्ण क्षमतेने सेवा देत असल्याने दुबईत त्यांना बरेच प्रवासी मिळत आहेत. दुबईहून येणारी विमाने दिल्ली किंवा मुंबई या मोठ्या विमानतळांवर उतरण्याआधी कोची, मंगळुरू, तिरुवनंतपुरम, अहमदाबाद या मार्गे प्रवाशांना सोडून येत असल्याने फेऱ्यांना प्रतिसाद वाढत असल्याचे सूत्रांनी सांगितले.
दुबईतून मुंबईत आलेले प्रवासीतारीख प्रवासी फेरी२६ मे २३० दुबई - तिरुवनंतपुरम-मुंबई२५ २३८ दुबई-कोची-मुंबई२२ मे २३३ दुबई-मुंबई१९ २४५ दुबई - तिरुवनंतपुरम-मुंबई