नवी दिल्ली : ई-स्कूटरसोबत विकलेल्या चार्जरचे १०० टक्के पैसे ग्राहकांना परत करण्याचा निर्णय भारतातील आघाडीच्या चार इलेक्ट्रिक टू-व्हीलर उत्पादक कंपन्यांनी घेतला आहे. ओला, ॲथर, हीरो आणि टीव्हीएस या कंपन्यांनी ‘ऑटोमोटिव्ह रिसर्च असोसिएशन ऑफ इंडिया’ला (एआरएआय) ही माहिती दिली आहे. या कंपन्यांविरुद्ध चौकशी सुरू होती.
एका वृत्तानुसार, या कंपन्यांनी फेम-२ योजनेंतर्गत सबसिडी मिळविण्यासाठी स्कूटर आणि चार्जर वेगवेगळे विकल्याचे दाखवले होते. त्यातही त्यांनी चलाखी करून वाहनांच्या किमती कमी दाखवून चार्जर व सॉफ्टवेअरच्या किमती जास्त दाखविल्या होत्या. नंतर सॉफ्टवेअर अपडेटच्या नावाखालीही कंपन्यांनी ग्राहकांकडून पैसे वसूल केले होते.
या हेराफेरीबद्दल अवजड उद्योग मंत्रालयाने चौकशी सुरू केली होती. त्यामुळे कंपन्या आता चार्जरचे पैसे ग्राहकांना परत करणार आहेत. या चार कंपन्या सुमारे २८७.८३ कोटी रुपये ग्राहकांना परत करतील. याशिवाय ॲथरकडून सॉफ्टवेअर अद्ययावतीकरण व बॅटरीच्या कमी क्षमतेबद्दल आणखी २५ कोटी रुपये अवजड उद्योग मंत्रालय वसूल करणार आहे.
दुसरीकडे, फेम धोरण दस्तऐवज आणि सीएमव्हीआर अंतर्गत नमूद केलेल्या सर्व आवश्यकतांचे पूर्ण पालन टीव्हीएसएमने केले आहे, असे टीव्हीएस मोटर कंपनीचे संचालक आणि मुख्य कार्यकारी अधिकारी केएन राधाकृष्णन यांनी म्हटले आहे. ते म्हणाले, इलेक्ट्रिक मोबिलिटीला प्रोत्साहन देण्याच्या भारत सरकारच्या दृष्टीकोनाशी टीव्हीएसएम पूर्णपणे वचनबद्ध आहे, याचा आम्ही पुनरुच्चार करू इच्छितो. इलेक्ट्रिक मोबिलिटीचा वेगाने अवलंब करणे, इलेक्ट्रिक व्हेइकल इको-सिस्टीमचा विकास आणि आत्मनिर्भर भारताच्या आकांक्षेला सक्षम करण्यासाठी सर्व विद्युत विकास गोष्टी इन हाऊस करणे, अशा भारत सरकारच्या उपक्रमांना पूर्ण समर्थन देत आहे.
चार्जिंगच्या वेळेबाबत ग्राहकांच्या पर्यायात सुधारणा करण्यासाठी आम्ही जेव्हा TVS iQube चे सध्याचे प्रकार सादर केले तेव्हा २२ मे पासून आम्ही बोर्ड चार्जर बंद केले. मे २०२२ ते एप्रिल २०२३ या कालावधीत TVS iQube खरेदी केलेल्या ग्राहकांचे कौतुक करण्यासाठी टीव्हीएसएम फेम द्वारे निश्चित केलेल्या मर्यादेपेक्षा जास्त आणि त्याहून अधिक पैसे भरले आहेत अशा आपल्या ग्राहकांसाठी लाभ योजना लागू करेल. काही शहरांमध्ये, चार्जरसह आमच्या किमती फेमने निर्दिष्ट केलेल्या मर्यादेच्या आत आहेत. काही शहरांमध्ये किंवा विशिष्ट मॉडेल्समध्ये, आम्ही फेमच्या थ्रेशोल्ड मर्यादेपेक्षा किंचित जास्त आहोत. सरासरी परतावा सुमारे १७०० रुपये प्रती वाहन आहे. पुढील दोन ते चार आठवड्यांत, कंपनी परताव्यासाठी पात्र असलेल्या ग्राहकांशी संपर्क साधेल. टीव्हीएस मोटर कंपनीला एकूण खर्चाचा परिणाम २० कोटी रुपयांपेक्षा कमी आहे, असेही केएन राधाकृष्णन म्हणाले.