नवी दिल्ली : विदेशी गुंतवणूकदारांनी (एफपीआय) नोव्हेंबरमध्ये भारतीय भांडवली बाजारपेठेत १२,२६० कोटी रुपयांची गुंतवणूक केली आहे. ही गुंतवणूक दहा महिन्यांच्या उच्चांकावर आहे. कच्च्या तेलाच्या दरात घसरण व रुपयात सुधारणा झाल्याने गुंतवणूक वाढली.या आधी सप्टेंबर व आॅक्टोबरमध्ये गुंतवणूकदारांनी भांडवली बाजारातून जवळपास ६० हजार कोटी रुपये काढून घेतले होते. त्या आधी जुलै-आॅगस्टमध्ये ७,३०० कोटी रुपयांची गुंतवणूक केली होती. आता नोव्हेंबरमध्ये एफपीआयने शेअर बाजारात ६,९१३ कोटी रुपये व कर्ज बाजारात ५,४३७ कोटी रुपये गुंतविले होते. त्यामुळे भांडवली बाजारात त्यांची एकूण गुंतवणूक १२,२६० कोटी रुपयांची झाली. जानेवारीमध्ये एफपीआयने २२,२४० कोटी रुपयांची गुंतवणूक केली होती. जानेवारी, मार्च, जुलै व आॅगस्ट या महिन्यांत गुंतवणूकदारांनी बाजारात ३२,००० कोटी रुपयांची गुंतवणूक केली. एफपीआयने सप्टेंबर २०१८ मध्ये भांडवली बाजारातून (शेअर व कर्ज) २१ हजार कोटी रुपयांपेक्षा अधिक रक्कम काढून घेतली. आॅक्टोबरमध्येही रक्कम काढणे सुरूच होते.
विदेशी गुंतवणूक दहा महिन्यांच्या उच्चांकावर
By ऑनलाइन लोकमत | Published: December 03, 2018 4:46 AM