जी. डी. बिर्ला स्मृती बॅडमिंटन:

गुलाम-राजन यांची शानदार आगेकूच
मुंबई: गुलाम वहान्वती आणि राजन सामंत या बॉम्बे जिमखानाच्या जोडीने दुहेरी १००+ एकत्रित वयोगटात आपल्याच संघाच्या सुनील वासवानी-याझदी मरोलीया या जोडीला नमवत २३व्या जी. डी. बिर्ला स्मृती मास्टर्स आंतर क्लब बॅडमिंटन स्पर्धेच्या उप-उपांत्यपुर्व फेरीत प्रवेश केला.
बॉम्बे जिमखानाच्या वतीने सुरु असलेल्या या स्पर्धेत गुलाम-राजन या जोडीने एकतर्फी झालेल्या सामन्यात वर्चस्व राखताना सुशील-याझदी यांचा ३०-१९ असा पाडाव करीत आगेकूच केली. सीसीआयच्या अतुल मर्चंट-सुरज अवरतमानी जोडीने चुरशीच्या झालेल्या सामन्यात मोक्याच्यावेळी आपला खेळ उंचावताना महेश छाब्रीया-प्रदीप सरकार यांचा ३०-२६ असा पाडाव केला. तर अन्य एका अटीतटीच्या सामन्यात प्रणील आचरेकर-सुरेश मिरगल (एमबीपीटी) या जोडीने झुंजार खेळ करताना जेएनपीटीच्या सी. आर. घरत-दिगंबर कडू या जोडीला ३०-२५ असे नमवले. तर एकतर्फी झालेल्या सामन्यात बिभाष चॅटर्जी-दिनेश गोलबरे यांनी आक्रमक खेळाच्या जोरावर एम. ओ. जॉन्सन-सौरभ प्रधान यांचा ३०-१६ असा धुव्वा उडवला.
त्याचवेळी पुरुषांच्या दुहेरी एकत्रित ८०+ वयोगटामध्ये राजीव संपत-सुशांत निदोदी या एमसीएफच्या जोडीने दणदणीत आगेकूच करताना ठाण्याच्या अजित थट्टे-डॉ. रत्नाकर या जोडीचा ३०-१० असा धुव्वा उडवला. बॉम्बे जिमखानाच्या गौतम सावंत-राजेश जाधव या जोडीने देखील सहज आगेकूच करताना बी. व्ही. जॉर्ज-संतोष के. आर. या जोडीला ३०-१७ असे नमवले. (क्रीडा प्रतिनिधी)