लोकमत न्यूज नेटवर्क, नवी दिल्ली : भारतीय अर्थव्यवस्था मार्चच्या तिमाहीत ७.८ टक्के दराने वाढली असून आर्थिक वर्ष २०२३-२४ मध्ये जीडीपी वाढीचा दर ८.२ टक्के असेल, असे भारत सरकारच्या वतीने जारी करण्यात आलेल्या अधिकृत आकडेवारीत म्हटले आहे. जानेवारी-मार्च तिमाहीतील भारताचा विकास दर डिसेंबर तिमाहीतील ८.६ टक्क्यांच्या तुलनेत थोडा कमी राहिला आहे.
राष्ट्रीय सांख्यिकी कार्यालयाने (एनएसओ) जारी केलेल्या अधिकृत आकडेवारीनुसार, आर्थिक वर्ष २०२३-२४ मध्ये अर्थव्यवस्था ८.२ टक्के दराने वाढली. २०२२-२३ मध्ये हा दर ७ टक्के होता. आर्थिक वर्ष २०२२-२३ च्या जानेवारी-मार्च तिमाहीत सकळ राष्ट्रीय उत्पन्नाचा (जीडीपी) विकास दर ६.२ टक्के होता.
अशी झाली वाढ...
- २०१८-१९ ६.५
- २०१९-२० ३.९
- २०२०-२१ -५.८
- २०२१-२२ ९.७
- २०२२-२३ ७.०
- २०२३-२४ ८.२
जगात वेगवान वाढ
- दुसऱ्या अंदाजात एनएसओने आर्थिक वर्ष २०२३-२४ चा वृद्धी दर ७.७ टक्के अनुमानित केला होता. त्यापेक्षा जास्त वेगाने भारताची अर्थव्यवस्था वाढली आहे. जगात सर्वाधिक वाढीचा हा दर आहे.
- वर्ष २०२४ च्या पहिल्या ३ महिन्यांत चीनचा विकास दर ५.३ टक्के राहिला. भारताच्या तुलनेत तो खूपच कमी आहे.