देशांतर्गत विमान प्रवासातही आता इंटरनेट मिळणे शक्य

आतापर्यंत विमानात वाय-फाय सेवा नव्हती आणि स्मार्टफोनही फ्लाइट मोडमध्ये सुरू ठेवायलाच संमती होती.

दिल्ली : यापुढे देशांतर्गत विमानातून प्रवास करतानाही प्रवाशांना वाय-फायचा वापर करता येणार आहे. केंद्र सरकारने तशी परवानगी दिली असून, ‘ही सेवा देणारी विस्तारा’ही पहिली विमान कंपनी असेल. आतापर्यंत विमानात वाय-फाय सेवा नव्हती आणि स्मार्टफोनही फ्लाइट मोडमध्ये सुरू ठेवायलाच संमती होती.
विमान प्रवासात प्रवाशाचा स्मार्टफोन, लॅपटॉप, टॅब्लेट, स्मार्टवॉच वा पीओएस फ्लाइट मोडमध्ये असेल, तर त्याला वाय-फाय सेवा उपलब्ध करून देण्याचा अधिकार वैमानिकाला असेल, असे केंद्र सरकारकडून काढण्यात आलेल्या अधिसूचनेत स्पष्ट केले आहे.
विमानात ही वाय-फाय सेवा मिळणार असल्याने प्रवाशांना इंटरनेटचा वापर करून व्हिडीओ पाहणे, चॅट करणे, तसेच संभाषण करणे आता शक्य होणार आहे. वाय-फायशिवाय मात्र हे करणे शक्य होणार नाही. ‘विस्तारा’च्या विमानांत ही सेवा देण्यासंदर्भात पॅनासॉनिक एव्हिओनिक्स आणि टाटा समूहाच्या नेल्को लिमिटेड यांच्यात अलीकडेच करार झाला होता.
त्यामुळेच एअर विस्तारामध्ये वाय-फायची सेवा सर्वात आधी मिळू शकणार आहे. कंपनीच्या बोइंग ७८७-९ या ड्रीमलाइनरमध्ये प्रवाशांना आम्ही सुविधा देऊ, असे विस्ताराने म्हटले आहे. मात्र, टप्प्याटप्प्याने देशातील अन्य विमान कंपन्यांनी निश्चितच ही सेवा आपल्या प्रवाशांना देतील.
विमानांत वाय-फाय सेवा उपलब्ध करून देण्याचा पूर्ण अधिकार वैमानिकाला असणार आहे, तसेच वाय-फाय सेवा नसताना स्मार्टफोनचा वापर करता येणार नाही. म्हणजे मोबाइलद्वारे विना वाय-फाय संभाषण करता येणार नाही.
गेल्या वर्षी केंद्र सरकारने विमानांत मोबाइल संभाषण करण्यास संमती द्यावी, असा विचार केला होता. तसा मसुदाही तयार आहे, पण त्यावर सध्या निर्णय घेण्यात आलेला नाही.