टाटा सन्सचे (Tata Sons) अध्यक्ष रतन टाटा (Ratan Tata) हे देशातील सर्वात प्रतिष्ठित उद्योगपतींपैकी एक आहेत. देश-विदेशात त्यांचं नाव आहे. पण त्याचे धाकटे बंधू जिमी टाटा (Jimmy Tata) यांचे नाव फार कमी लोकांना माहीत असेल. ते रतन टाटा यांच्यापेक्षा दोन वर्षांनी लहान आहेत आणि मुंबईतील कुलाबा येथे दोन बेडरूमच्या फ्लॅटमध्ये राहतात. रतन टाटा यांच्याप्रमाणेच जिमी टाटादेखील बॅचलर आहेत. जिमी टाटा हे कायमच प्रसिद्धीपासून दूर राहतात. यामुळे त्यांचा अनेकांना परिचय नाही.
उद्योगपती हर्ष गोएंका (businessman Harsh Goenka) यांनी बुधवारी त्यांच्याबद्दल एक ट्वीट केलं. त्यांनी आपल्या ट्वीटमध्ये जिमी टाटा यांचा फोटो शेअर करत एक माहितीही लिहिली. "तुम्हाला जिमी टाटा, मुंबईतील कुलाबा येथे दोन बेडरूमच्या फ्लॅटमध्ये राहणारे रतन टाटा यांचे धाकटे बंधू माहीत आहेत का? त्यांना व्यवसायात कधीच रस नव्हता. ते एक चांगले स्क्वॉशपटू आहेत आणि प्रत्येक वेळी मला खेळात हरवतात. टाटा समूहाप्रमाणेच तेदेखील प्रसिद्धीपासून दूर राहतात," असं गोएंका म्हणाले.