लोकमत न्यूज नेटवर्क, नवी दिल्ली : जागतिक अर्थव्यवस्थेतील नरमाईमुळे कर्मचारी कपातीचा सिलसिला सुरूच असून, जगातील सर्वांत मोठी सीटबेल्ट व एअरबॅग्ज उत्पादक कंपनी ऑटोलिव्हने ८ हजार कर्मचाऱ्यांना कामावरून काढण्याचा निर्णय घेतला आहे. तर भारतातील आघाडीची एज्युटेक कंपनी बायजूसने आणखी १ हजार कर्मचाऱ्यांना काढले आहे.
ऑटोलिव्ह ही स्विडीश कंपनी असून, महागाईच्या पार्श्वभूमीवर खर्च कपातीचा उपाय म्हणून कंपनीकडून कर्मचारी कपात केली जात आहे. यापैकी ६ हजार कर्मचाऱ्यांना थेट नोकरकपातीचा फटका बसेल, तर २ हजार जणांना अप्रत्यक्ष फटका बसेल, असे कंपनीने म्हटले आहे. या कर्मचारी कपातीमुळे कंपनीचे युरोपातील अनेक प्रकल्प बंद होतील. दरम्यान, व्होल्व्होने मागच्याच महिन्यात १,३०० कर्मचाऱ्यांची कपात केली आहे.
यापूर्वीही ५ हजार जणांना काढले
- भारतातील आघाडीची एज्युटेक कंपनी बायजूसने आणखी १ हजार कर्मचाऱ्यांना काढण्याचा निर्णय घेतला आहे. ६ महिन्यांपूर्वी कंपनीने ५ हजार कर्मचाऱ्यांना घरी बसवले होते.
- कंपनीने आपल्या विपणन व्यवस्थापकांना सूचना देऊन २८० ट्युशन सेंटरवरील प्रत्येकी २ विक्री व विपणन कर्मचाऱ्यांना काढून टाकण्यास सांगितले आहे. १५० विक्री व्यवस्थापकांनाही आपल्या नोकऱ्या गमवाव्या लागणार आहेत.
बेरोजगारी सर्वाधिक कुठे?
नायजेरिया ३३.३% द. अफ्रिका ३२.९% इराक १५.५५% स्पेन १३.२६% तुर्की १०% इराण ९.७% इटली ७.८% भारत ७.८% चीन ५.३% कॅनडा ५% ब्रिटन ३.९% द. कोरिया २.६% कतार ०.१%