मुंबई : विख्यात महिला उद्योगपती व बायोकॉन लिमिटेड या बॉयोटेक्नॉलॉजी कंपनीच्या अध्यक्षा व प्रबंध संचालक किरण मुजुमदार-शॉ यांना इन्फोासस टेक्नॉलॉजीने कंपनीचे १६०० समभाग परवानगी न घेता विकले म्हणून ९.५० लाख दंड ठोठावला आहे. विशेष म्हणजे ही रक्कम किरण मुजुमदार शॉ यांना एखाद्या धर्मादाय संस्थेला दान करायची आहे.
मुजुमदार-शॉ या इन्फोसिसच्याही प्रमुख स्वतंत्र संचालक (लीड इंडिपेंडंट डायरेक्टर) आहेत. त्यामुळे त्यांना इन्फोसिसचे समभाग विकायचे असतील तर व्यवस्थापनाची परवानगी घेणे आवश्यक आहे. नाही तर ते इनसायडर ट्रेडिंग ठरते. हा नियम किरण मुुजुमदार-शॉ यांचे शेअर बाजारातील व्यवहार सांभाळणाऱ्या कंपनीला बहुधा माहीत नसावा. त्यामुळे त्यांनी मुजुमदार-शॉ यांच्या मालकीचे १६०० समभाग इन्फोसिसची परवानगी न घेताच बॉम्बे स्टॉक एक्स्चेंजमध्ये विकून टाकले. विशेष म्हणजे या व्यवहाराबाबत मुजुमदार-शॉ या पूर्णत: अनभिज्ञ होत्या. इनसायडर ट्रेडिंग नियमांचा भंग झाल्याने मुजुमदार-शॉ यांना इन्फोसिस व्यवस्थापनाने ९.५० लाख दंड ठोठावून ती रक्कम एखाद्या धर्मादाय संस्थेला दान करावी, असा आदेश दिला आहे.