पेटीएम गेल्या काही दिवसांपासून अडचणीत आहे, आता या अडचणीत आणखी वाढ झाली आहे. २०२२ मध्ये सुरू झालेली कर्मचाऱ्यांची कपात आणखी सुरुच आहे. आता पुन्हा एकदा पेटीएमने कर्मचाऱ्यांची कपात केली आहे. देशातील सर्वात मोठ्या डिजिटल प्लॅटफॉर्मपैकी एक असलेल्या पेटीएममधून १,००० हून अधिक कर्मचाऱ्यांना नोकरीवरुन काढण्यात आले आहे.
अहवालानुसार, Paytm ची मूळ कंपनी One97 Communications ने यावेळी १००० हून अधिक कर्मचाऱ्यांना कामावरून काढले आहे. गेल्या काही महिन्यांत ही टाळेबंदी झाली आहे आणि पेटीएमच्या विविध युनिट्सचे कर्मचारी बळी पडले आहेत. पेटीएमने आपला खर्च कमी करण्यासाठी आणि आपल्या विविध व्यवसायांची पुनर्रचना करण्यासाठी ही टाळेबंदी केली आहे.
भारताच्या जवळ पोहोचले 'गाझा'चे युद्ध; अब्जावधी डॉलर्सचा व्यवसाय धोक्यात, तुमच्या खिशाला कात्री
पेटीएमच्या या टाळेबंदीमुळे, त्याच्या एकूण कर्मचार्‍यांपैकी सुमारे १० टक्के कर्मचाऱ्यांना नोकऱ्या सोडाव्या लागल्या आहेत. भारतीय स्टार्टअपमधील ही आतापर्यंतची सर्वात मोठी टाळेबंदी मानली जाते. २०२३ हे स्टार्टअप कंपन्यांसाठीही चांगले वर्ष ठरले नाही. या वर्षी, भारतीय स्टार्टअप्सनी पहिल्या तीन तिमाहीत २८ हजारांहून अधिक कर्मचाऱ्यांना कामावरून काढून टाकले. याआधी २०२२ मध्ये स्टार्टअप कंपन्यांनी २० हजारांहून अधिक कर्मचार्‍यांना काढून टाकले होते आणि २०२१ मध्ये ४ हजारांहून अधिक कर्मचार्‍यांना कामावरून काढून टाकण्यात आले होते.
RBI च्या कारवाईचा परिणाम
यापूर्वी, रिझर्व्ह बँकेने असुरक्षित कर्जांवर नियामक निर्बंध लादले होते, यामुळे पेटीएमवरही परिणाम झाला होता. आरबीआयच्या कारवाईनंतर, पेटीएमने छोटे तिकीट ग्राहक कर्ज बंद करण्याचा निर्णय घेतला आणि आता खरेदी करा, नंतर व्यवसाय करा. आता काढून टाकलेल्या कर्मचाऱ्यांमध्ये सर्वाधिक फटका या दोन विभागातील कर्मचाऱ्यांना बसल्याचे बोलले जात आहे.
शेअर बाजारातही कंपनी सतत संघर्ष करत आहे. पेटीएमचे शेअर्स गेल्या एका महिन्यात जवळपास २८ टक्क्यांनी घसरले आहेत. गेल्या ६ महिन्यांत त्याची किंमत २३ टक्क्यांहून अधिक कमी झाली आहे. डिसेंबर महिन्याच्या सुरुवातीला पेटीएम स्टॉकला २० टक्के लोअर सर्किटला सामोरे जावे लागले. आता टाळेबंदीच्या बातम्या समोर आल्यानंतर शेअर्सवर आणखी विपरीत परिणाम होण्याची शक्यता आहे.