भारताचे पंतप्रधान नरेंद्र मोदी यांच्या अमेरिका दौऱ्याआधीच भारतीयांसाठी आनंदाची बातमी समोर आली आहे. पीएम मोदी अमेरिकेला पोहोचण्यापूर्वी एक अब्ज डॉलर्सचे रिटर्न गिफ्ट मिळाले आहे. अमेरिकन चिपमेकर मायक्रोन टेक्नॉलॉजीने एक अब्ज डॉलर्सच्या गुंतवणुकीची घोषणा केली आहे, जी येत्या काही दिवसांत २ अब्ज डॉलरपर्यंत पोहोचू शकते. चीन आणि अमेरिका यांच्यातील तणावामुळे अमेरिकन कंपन्यांनी भारतावर विश्वास दाखवायला सुरुवात केली आहे. सेमीकंडक्टरच्या बाबतीत जगाने चीनवर अवलंबून राहू नये, अशी अमेरिकेची इच्छा आहे. आता जागतिक सेमीकंडक्टर बाजाराची कमान भारताकडे सोपवण्याची तयारी सुरू आहे. भारत सरकारने भारतीय चिप निर्मात्यांना १० अब्ज डॉलर्स देण्याची घोषणा देखील केली आहे.
स्पोर्ट्स ड्रिंक्सपासून ते प्रीमियम ड्राय फ्रूट्सपर्यंत; पतंजलीने लॉन्च केले 14 नवीन प्रोडक्ट्स
मिळालेल्या माहितीनुसार, पंतप्रधान नरेंद्र मोदी पुढील आठवड्यात अमेरिकेच्या दौऱ्यावर येताच या कराराची घोषणा केली जाऊ शकते. एक अब्ज डॉलर्सची ही रक्कम दोन अब्ज डॉलर्सपर्यंत पोहोचू शकते. कराराला अंतिम स्वरूप देण्याची तयारी सुरू आहे. हा करार मोदींच्या महत्त्वाकांक्षी ‘मेक इन इंडिया’ला मोठा बळ देणारा ठरणार आहे. तसेच, वॉशिंग्टनला चीनबाहेरील प्रमुख पुरवठा साखळी मजबूत करण्याची संधी देईल.
अमेरिकेचे राष्ट्रीय सुरक्षा सल्लागार जेक सुलिव्हन यांनी मंगळवारी नवी दिल्लीत सांगितले की, दोन्ही देशांमधील तंत्रज्ञान व्यापारातील अडथळे दूर करणे हा मोदींच्या राज्य दौऱ्याचा महत्त्वाचा भाग आहे. दुसरीकडे, मायक्रोनने शुक्रवारी आपल्या चीनी प्लांटमध्ये नोकऱ्या निर्माण करण्यासाठी आणि स्थानिक बाजारपेठेला पाठिंबा देण्यासाठी ६०० मिलियन डॉलर गुंतवणूक करण्याचे आश्वासन दिले. तसे, या करारावर भारताच्या तंत्रज्ञान मंत्रालय आणि परराष्ट्र मंत्रालयाकडून कोणतेही विधान आलेले नाही आणि मायक्रोनने देखील याबद्दल कोणतेही भाष्य केलेले नाही.
वाढत्या चिनी तणावामुळे तैवानसारख्या आशियाई उत्पादन केंद्रांवर जगाचे अवलंबित्व कमी होत असल्याने अमेरिका प्रगत चिपमेकिंगमध्ये विविधता आणण्याचा प्रयत्न करत आहे. अमेरिकेतील सर्वात मोठी मेमरी चिप निर्माता कंपनी मायक्रोनने जपानमध्ये उभारल्या जाणार्‍या ३.६ अब्ज डॉलर नेक्स्टजेन प्लांटसाठी आर्थिक पाठबळही मिळवले आहे. २१ जून रोजी मोदी त्यांचा पहिला औपचारिक राज्य दौरा सुरू करत आहेत, ज्याच्या दुसऱ्या दिवशी राष्ट्राध्यक्ष जो बिडेन त्यांच्यासाठी मेजवानीचे आयोजन करतील. पंतप्रधान मोदी अमेरिकन काँग्रेसलाही संबोधित करणार आहेत. मोदींनी भारतातील चिप निर्मात्यांना आकर्षित करण्यासाठी १० अब्ज डॉलर देण्याची घोषणा केली आहे.