लखनौ : दुसऱ्या पायाभरणी समारंभात समाविष्ट असलेल्या औद्योगिक प्रकल्पांमुळे उत्तर प्रदेश हे एक लाख कोटी डॉलरची अर्थव्यवस्था असलेले देशातील पहिले राज्य बनेल, असे प्रतिपादन फ्लिपकार्ट समूहाचे मुख्य कार्यकारी अधिकारी (सीईओ) कल्याण कृष्णमूर्ती यांनी रविवारी केले. गेल्या वर्षी झालेल्या ‘उत्तर प्रदेश गुंतवणूकदार शिखर परिषदे’त मोठ्या प्रमाणात गुंतवणूक करारांवर स्वाक्षºया करण्यात आल्या होत्या. त्यातील ६५ हजार कोटी रुपयांच्या औद्योगिक प्रकल्पांचा पायाभरणी समारंभ रविवारी येथे पार पडला. हा राज्यातील अशा प्रकारचा दुसरा पायाभरणी समारंभ होता. पहिला पायाभरणी समारंभ गेल्या वर्षी जुलैमध्ये झाला होता. पहिल्या टप्प्यात ६० हजार कोटी रुपयांचे प्रकल्प समाविष्ट होते.
कृष्णमूर्ती यांनी सांगितले की, हा पायाभरणी समारंभ उत्तर प्रदेशला देशातील आघाडीचे औद्योगिक राज्य, तसेच नव्या संकल्पनांचे भांडार बनविण्यात साह्यभूत ठरेल. राज्याचे मुख्यमंत्री योगी आदित्यनाथ यांची दूरदृष्टी आणि सक्षम पुढाकार यामुळे गुंतवणूकदारांच्या मनात विश्वास निर्माण झाला आहे. व्यवसाय सुलभतेत आणखी सुधारणा होणेही अपेक्षित आहे. कृष्णमूर्ती यांनी म्हटले की, फ्लिपकार्टसाठी उत्तर प्रदेश हे एक महत्त्वाचे राज्य आहे. राज्यात आमचे अनेक विक्रेते आणि एमएसएमई उत्पादक आहेत. त्याचबरोबर स्थानिक हस्तकारागिरांनाही त्यांच्या उत्पादनांच्या मार्केटिंगसाठी आम्ही प्रोत्साहित करीत आहोत. हजारो कारागीर, छोटे व्यावसायिक आणि महिला उद्यमी फ्लिपकार्टसोबत भागीदारी करीत आहेत. त्यांना संपूर्ण देशाची बाजारपेठ आम्ही उपलब्ध करून देत आहोत.कृष्णमूर्ती यांनी म्हटले की, लक्षावधी लोकांच्या जीवनात बदल घडविण्याचा आमचा प्रयत्न असून, त्याचा आम्हाला अभिमान वाटतो. मायंत्रा फॅशन प्लॅटफॉर्मच्या माध्यमातून राज्यांच्या सीमांची बंधने तोडून कारागीर व विणकरांना बाजारपेठ उपलब्ध करून देण्याचा आमचा प्रयत्न आहे.