E Factor Experiences IPO: ई फॅक्टर एक्सपिरिअन्सेस आयपीओची शेअर बाजारात जबरदस्त एन्ट्री झाली आहे. एनएसईवर कंपनीची ५३.३३ टक्के प्रीमिअमसह ११५ रुपयांवर लिस्टिंग झालं. परंतु काही वेळातच कंपनीच्या शेअर्सना ५ टक्क्यांचं अपर सर्किट लागलं. यानंतर कंपनीचे शेअर्स १२०.७५ रुपयांवर पोहोचले. E Factor Experiences IPO गुंतवणूकदारांसाठी २७ सप्टेंबर ते ३ ऑक्टोबर या कालावधीपर्यंत खुला होता. यानंतर पात्र गुंतवणूकदारांना ६ ऑक्टोबर रोजी शेअर्स अलॉट करण्यात आले. या आयपीओचा प्राईज बँड ७१ रुपये ते ७५ रुपये निश्चित करण्यात आला होता.
१६०० शेअर्सचा एक लॉट
E Factor Experiences च्या आयपीओची साईज २५.९२ कोटी रुपये होती. कंपनीनं ३४.५६ लाख फ्रेश शेअर्स आयपीओद्वारे जारी करण्यात आले आहेत. कंपनीच्या आयपीओची लॉट साईज १६०० शेअर्सची होती. यामध्ये एखाद्या गुंतवणूकदाराला किमान १ लाख २० हजार रुपयांची गुंतवणूक करावी लागणार होती. कोणत्याही गुंतवणूकदाराला जास्तीतजास्त २ लॉटसाठी गुंतवणूक करण्याची संधी देण्यात आली होती.
४ दिवसांत ८० पट सबस्क्राईब
E Factor Experiences कंपनीचा आयपीओ अखेरच्या दिवशी ७३ पटींपेक्षा अधिक सबस्क्राईब झाला. कंपनीचा आयपीओ ४ दिवसांसाठी खुला होता. या दरम्यान तो ८० टक्क्यांपेक्षा अधिक सबस्क्राईब झाला. E Factor Experiences कंपनीनं अँकर गुंतवणूकदारांद्वारे ७.३८ कोटी रुपये जमवले होते.
काय करते कंपनी?
ही एक इव्हेंट मॅनेजमेंट कंपनी आहे. कंपनी लायटिंग, साऊंडसह अन्य सर्व कार्यक्रमांशी संबंधित कामं करते. E Factor Experiences ला सरकारी प्रोजेक्ट्सही मिळतात. सध्या ही कंपनी दिल्ली, ओदिशा, जयपूर आणि नोएडामध्ये काम करत आहे.
(टीप: यामध्ये शेअरच्या कामगिरीविषयी माहिती देण्यात आली आहे. हा गुंतवणूकीचा सल्ला नाही. कोणत्याही प्रकारची गुंतवणूक करण्यापूर्वी या क्षेत्रातील जाणकार किंवा तज्ज्ञांचा सल्ला घेणं आवश्यक आहे.)