१८ कागदपत्रांची पूर्तता करताना उमेदवारांची दमछाक

नागभीड : तालुक्यात ४३ ग्रा.पं.ची निवडणूक होणारआहे. ३० डिसेंबरपर्यंत नामांकन अर्ज स्वीकारण्यात येणार असल्याने इच्छूकांची धावपळ सुरू आहे. यावेळी उमेदवारांना प्रथमच १८ प्रकारचे कागदपत्रे गोळा करता प्रत्येकाची दमछाक होत आहे. मंगळवारपर्यंत ७२७ उमेदवारांनी आँनलाईन अर्ज दाखल केले.

१५ जानेवारी २०२१ रोजी होऊ घातलेल्या निवडणुकीची नामांकन दाखल करण्याचा मंगळवारी शेेवटचा दिवस आहे. निवडणुकीसाठी नामांकन अर्जसोबत १८ प्रकारची कागदपत्रे जोडावी लागत आहेत. यात आँनलाईन भरलेले नामांकनाची स्वाक्षरी प्रत, गुन्हेगारी पार्श्वभूमी नसल्याचे स्वयघोषणापत्र, जात वैधता प्रमाणपत्र सादर केल्याचे टोकन, मालमत्ता व दायित्वाचे स्वयंघोषणापत्र, चिन्हांच्या मागणीचे पत्र, मतदार यादीत नाव असल्याची प्रमाणित प्रत, रहिवासी दाखला, शौचालय असल्याचा दाखला, अपत्याचा दाखला, थकबाकी नसल्याचे प्रमाणपत्र, कंत्राटदार नसल्याचे प्रमाणपत्र, जातीचे प्रमाणपत्र, आधारकार्ड, निवडणूक कार्ड, वयाचे प्रमाणपत्र, शैक्षणिक प्रमाणपत्र, गृहकर व पाणीकर पावती तसेच नवीन खाते उघडलेले बँकेचे पासबुक आदी कागदपत्रांचा समावेश आहे.

७२७ उमेदवारांचे अर्ज दाखल

नागभीड तालुक्यातील ४३ ग्रामपंचायतींसाठी ३६३ सदस्यांची निवडणूक होणार आहे. यासाठी मंगळवारपर्यंत ७२७ उमेदवारांनी आँनलाईन अर्ज दाखल केले. उमेदवारी अर्ज दाखल करण्यास बुधवार शेवटचा दिवस आहे. उमेदवार आँनलाईन अर्ज आपल्या सोयीनुसार दाखल करून आँफलाईन अर्ज दाखल करण्यासाठी तहसील कार्यालयात येत आहेत.

राजकीय पक्षांचे लक्ष

ग्रामपंचायत स्तरावरील निवडणूक राजकीय पक्षांच्या चिन्हांवर लढविल्या जात नाही. कोण कोणत्या राजकीय पक्षाचा कार्यकर्ता व समर्थक आहे हे गावक-यांना ठाऊक असते. मात्र, गावातील आपल्या पक्षाच्या कार्यकर्त्यांचे मनोबल वाढविण्यासाठी विविध राजकीय पक्षांचे नागभीड येथील नेते तहसील कार्यालय परिसरात विविध सूचना करीत असल्याचे दिसून येत आहे.