गंगापूर पंचायत समितीच्या उपसभापतीपदी मुंदडा बिनविरोध

जानेवारीत झालेल्या ग्रामपंचायत निवडणुकीत सेनेचे उपसभापती संपत छाजेड सदस्य म्हणून विजयी झाल्याने त्यांनी २७ जानेवारी रोजी पदाचा राजीनामा दिला होता. तेव्हापासून हे पद रिक्त होते. मंगळवारी झालेल्या निवडणुकीत नामनिर्देशन पत्र दाखल करण्याच्या वेळेत सुमित मुंदडा यांचा एकमेव अर्ज आल्याने त्यांना बिनविरोध विजयी घोषित करण्यात आले. एकूण १८ सदस्य संख्या असलेल्या पंचायत समितीमध्ये सध्या भाजपाचे नऊ, तर सेनेचे आठ सदस्य आहेत. निवडणूक प्रक्रियेच्या वेळी भाजपाचे आठ सदस्य हजर होते, तर सेनेचे आठ व गेल्या वेळी भाजपाच्या गोटातून सेनेकडे गेलेले ज्ञानेश्वर आदमाने गैरहजर होते. अध्यासी अधिकारी म्हणून उपविभागीय अधिकारी माणिक आहेर यांनी काम पाहिले. नायब तहसीलदार अविनाश अंकुश व गटविकास अधिकारी विजय परदेशी यांनी त्यांना सहकार्य केले. यावेळी जिल्हा परिषद सदस्य मधुकर वालतुरे, शिवप्रसाद अग्रवाल, नगरसेवक प्रदीप पाटील, मारोती खैरे, आप्पासाहेब पाचपुते आदी उपस्थित होते.