तिहेरी अपघातात दुचाकीस्वार जखमी

ट्रक, कार व दुचाकी अशा तिहेरी अपघातात दुचाकीस्वार जखमी

वाळूज महानगर : ट्रक, कार व दुचाकी अशा तिहेरी अपघातात दुचाकीस्वार जखमी झाल्याची घटना गुरुवारी दुपारी ४ वाजेच्या सुमारास बजाजनगरातील महाराणा प्रताप चौकात घडली.

मोरे चौकाकडून रांजणगावच्या दिशेने गुरुवारी दुपारी ४ वाजेच्या सुमारास कार (एमएच- २०, डीजे-६७७५) व ट्रक (जीजे-१०, टीएक्स- १६७८) जात होते. जात असताना महाराणा प्रताप चौकात बीकेटी कंपनीकडून बजाजनगरकडे भरधाव जाणारा दुचाकीस्वार अचानक कारच्या समोर अडवा आला.

दुचाकीस्वाराला वाचविण्याच्या प्रयत्नात कार चालकाने कार उजव्या बाजूला दाबली. त्यामुळे कार व ट्रकची धडक झाली. भरधाव दुचाकीस्वाराचा ताबा सुटल्याने दुचाकी जाऊन ट्रकच्या पाठीमागील बाजूस धडकली. ट्रकचालकाने वेळीच ट्रकचे ब्रेक लावल्याने दुचाकीस्वार थोडक्यात बचावला.

अन्यथा मोठी दुर्घटना घडली असती. यात दुचाकीस्वार जखमी झाला असून, कारचे नुकसान झाले आहे. नागरिकांनी जखमीला खाजगी रुग्णालयात दाखल केले. दरम्यान या अपघाताच्या घटनेमुळे चौकात जवळपास अर्धा तास वाहतूक कोंडी झाली होती.

ट्रक चालकास मारहाण
ट्रकचालक मर्यादित वेगाने व रस्त्याच्या एका बाजूने जात होता. या अपघाताच्या घटनेत काहीही चूकी नसताना ट्रकचालकास दोषी धरुन काही तरुणांनी बेदम मारहाण केली. काही सुज्ञ नागरिकांनी मध्यस्थी करुन ट्रकचालकाची तरुणाच्या टोळक्यातून सुटका केली.