अल्पवयीन मुली व महिलांशी अनैतिक कृत्य करणाऱ्या विकृतास अटक  

तब्बल १८ गुन्हे आहेत दाखल, पोलिसांनी अटक केलेला वासनांध आरोपी कल्पेश देवधरे (३०) हा वाहन चालक असून तो मूळचा कांदिवली भागातील राहणार आहे  

मीरारोड - अल्पवयीन मुली , महिलां सोबत अश्लील अनैतिक प्रकार करणाऱ्या वासनांध विकृतास मीरा भाईंदर - वसई विरार पोलीस आयुक्तालयाच्या गुन्हे शाखा युनिट १ ने नालासोपारा येथून बेड्या ठोकल्या आहेत . त्या वासनांधवर मुंबईत तब्बल १७ तर १ वसई मध्ये विनयभंग , पोक्सो आदी स्वरूपाचे गुन्हे दाखल आहेत. 

मीरारोडच्या नया नगर पोलीस ठाण्यात १८ एप्रिल रोजी एका ९ वर्षीय अल्पवयीन बालिकेसोबत अनैतिक प्रकार घडल्याचा पोक्सो व बलात्कारचा गुन्हा दाखल झाला होता . अल्पवयीन मुली सोबत झालेल्या ह्या अतिप्रसंग मुळे परिसरात भीतीचे वातावरण झाले होते . पोलीस आयुक्त सदानंद दाते यांनी सदर गुन्ह्याचा तपास गुन्हेशाखे सोपवला होता . उपायुक्त डॉ . महेश पाटील यांच्या व सहायक आयुक्त अमोल मांडवे यांच्या मार्गदर्शनाखाली गुन्हे शाखा युनिट १ चे निरीक्षक अविराज कुराडे , सपोनि कैलास टोकले व पुष्पराज सुर्वे , उपनिरीक्षक हितेंद्र विचारे राजेंद्र वेदपाठक, राजु तांबे, किशोर वाडीले, अर्जुन जाधव, संदिप शिंदे, संजय शिंदे, अविनाश गर्जे, मुस्तकीन पठाण, पुषेंद्र थापा, संतोष लांडगे, सचिन सावंत, प्रशांत विसपुते, विकास राजपुत व सुमित जाधव यांचे पथक आरोपीच्या शोधात होते . 

पोलिसांनी घटनास्थळा पासून ते आरोपीच्या हालचाली पर्यंत सुमारे २०० ते २५० सीसीटीव्ही फुटेज तपासले .  आरोपी हा घटनास्थळी येतांना नालासोपारा येथून ट्रेनने मीरारोड येथे आल्याचे समजले. तसेच घटनेनंतर सदर आरोपी हा मीरारोड येथून मुंबई येथे गेल्याचे समजले. प्राप्त माहिती, फुटेज व तांत्रिक विश्लेषणच्या आधारे आरोपीची ओळख पटवून त्याला नालासोपारा येथून ताब्यात घेतले व बुधवारी नया नगर पोलिसांच्या स्वाधीन केले.  

पोलिसांनी अटक केलेला वासनांध आरोपी कल्पेश देवधरे (३०) हा वाहन चालक असून तो मूळचा कांदिवली भागातील राहणार आहे . तो १६ - १७ वर्षांचा असताना व्हिडीओ पार्लरमध्ये अश्लील सिनेमे पाहून त्याला अल्पवयीन मुली व महिलां सोबत अनैतिक व अश्लील प्रकार करण्याची विकृती जडली . त्याच्या ह्या दुष्कृत्या मुळेच घरच्यांनी त्याला हाकलून दिला असून सध्या तो मुंबई सेंट्रल येथील एका सामूहिक पेइंग गेस्ट ठिकाणी रहातो . त्याच्या विरुद्ध मुंबईतील  विविध पोलीस ठाण्यात २०११ साला पासून तब्बल १७ गुन्हे दाखल आहेत . वसईतील माणिकपूर पोईलीस ठाण्यात १ असे एकूण १८ गुन्हे दाखल आहेत . अनेक गुन्ह्यात तो अटक झाला असून जवळपास सर्वच गुन्हे हे विनयभंग , पोक्सो , अपहरण आदी स्वरूपाचे आहेत . आरोपीने असे अन्य गुन्हे केल्याची शक्यता आहे