लपून-छपून प्रेयसीला भेटायला पोहोचला प्रियकर, ग्रामस्थांनी पकडून लावले लग्न, पण सहा तासांनंतर घडले असे काही की...

Love Marriage News: सदर प्रियकर हा त्याच्या प्रेयसीला भेटण्यासाठी लपून-छपून घरात घुसला होता. मात्र तरुणीच्या आईने आरडा-ओरडा केल्याने दोघेही पकडले गेले.

रांची - झारखंडमधील गढवा येथून विवाहाचा एक अजब प्रकार समोर आला आहे. गढवा जिल्ह्यातील मझिआंव बरडिहा पोलीस ठाणे क्षेत्रातील मझिआंव गावामध्ये ग्रामस्थांनी एका प्रेमी युगुलाला पकडून त्यांचे लग्न लावून दिले. मात्र सहा तासांमध्येच या तरुणीला तिच्या माथ्यावर लावलेले कुंकू पुसावे लागले. (Love Marriage News) मिळालेल्या माहितीनुसार सदर प्रियकर हा त्याच्या प्रेयसीला भेटण्यासाठी लपून-छपून घरात घुसला होता. मात्र तरुणीच्या आईने आरडा-ओरडा केल्याने दोघेही पकडले गेले. मात्र त्यांचे लग्न लावून दिल्यानंतर सदर मुलगा हा अल्पवयीन असल्याचे समजले तेव्हा, सर्वांना धक्का बसला. (Boyfriend Arrived to meet the beloved in secret, The villagers caught both of them and arranged the marriage, It was later revealed that the young man was a minor)

या विवाहाबाबत तरुणीच्या आईने सांगितले की, गुरुवारी रात्री माझ्या घरामध्ये केवालरपुरा गावातील राकेश रजवार यांचा मुलगा चोरासारखा घुसला होता. त्यानंतर मी आरडाओरडा केला. आवाज ऐकून गावकऱ्यांनी धावत येत त्याला पकडले. त्यानंतर जमलेल्या गावकऱ्यांच्या जमावाने गावातील देवीच्या मंडपामध्ये मी नकार देत असतानाही माझ्या मुलीचा सदर तरुणासोबत विवाह लावून दिला.

मुलीची आई म्हणाली की, तिची मुलगी १९ वर्षांची आहे. तर तिचा मुलगा १६ वर्षांचा आहे. तसेच तो मद्यपीही आहे. कुंकू लावल्यानंतर ग्रामस्थांनी पोलीस ठाण्यात गेले पाहिजे, असे सांगितले तेव्हा आम्ही पोलीस ठाण्यात गेलो. तिथे मुलाचे वडील आधीपासून हजर होते. तेव्हा पोलिसांनी मुलीला एका अर्जावर अंगठा लावण्यास सांगितले. तसेच मुलगा अल्पवयीन आहे. त्यामुळे लग्न झाल्यास तो तुरुंगात जाईल, असे सांगितले. आमच्या दोन वेळच्या जेवणाची भ्रांत आहे, त्यात आम्ही केस कुठून लढणार असा प्रश्न होता. त्यानंतर पोलिसांनी त्या मुलाला आणि त्याच्या वडिलांना घरी पाठवला. तसेच ग्रामस्थांच्या सांगण्यावरून मी सुद्धा मुलीला लावलेले कुंकू पुसून टाकले.

याबाबत पोलीस म्हणाले की, ही घटना घडल्यानंतर दोन्हीकडचे नातेवाईक पोलीस ठाण्यात आले होते. तेव्हा आम्ही सदर मुलगी आणि मुलग्याला त्यांच्या त्यांच्या कुटुंबीयांकडे सोपवले. यासंदर्भात कुठल्याही पक्षाने लेखी तक्रार केलेली नाही.