अनैतिक संबंधात अडचण असलेल्या पतीची पत्नीकडून हत्या

अनमोड खून प्रक़रणात चौघांना अटक; डॉक्टरकडे नेण्याचा बहाणा करुन आणले गोव्यात

ठळक मुद्देया प्रकरणात कुळे पोलिसांनी मयताची पत्नी लक्ष्मी हिचा प्रियकर सुरेश पुजार यांच्यासह अन्य दोघांना अटक केली आहे. मयताची ओळख पटत नसल्यामुळे हा खूनाचा प्रकार उघडकीस येऊ शकला नव्हता.

मडगाव - मागच्या महिन्यात अनमोड घाटात सगनगौडा याचा केलेला खून अनैतिक संबंधातून झाल्याचे उघड झाले आहे. पतीची पत्नी लक्ष्मी हिने आपल्या प्रियकराच्या मदतीने त्याचा गळा आवळून खून केल्याचे निष्पन्न झाले असून या प्रकरणात कुळे पोलिसांनी मयताची पत्नी लक्ष्मी हिचा प्रियकर सुरेश पुजार यांच्यासह अन्य दोघांना अटक केली आहे.दक्षिण गोव्याचे अधीक्षक अरविंद गावस यांनी दिलेल्या माहितीप्रमाणे, अटक केलेल्या अन्य दोन संशयितांची नावे जगदीश कलप्पा चलवाडी व मुथप्पा सिद्धप्पा अनावलड असे असून ज्या गाडीतून मयत सगनला गोव्यात आणले होते ती गाडीही गदग येथून जप्त केली आहे.गावस यांनी दिलेल्या माहितीप्रमाणे, आपल्या प्रेम प्रकरणात पतीचा अडथळा येत असल्यामुळेच हा खून करण्यात आला. प्रथम त्याला दारुतून विष पाजण्यात आले व नंतर नायलॉन दोरीने त्याचा गळा आवळून खून करण्यात आला. हा मृतदेह अनमोडच्या जंगलात फेकून दिला होता. एका महिन्यापूर्वी कुळे पोलिसांना तो सापडला होता. मात्र मयताची ओळख पटत नसल्यामुळे हा खूनाचा प्रकार उघडकीस येऊ शकला नव्हता.पोलिसांच्या माहितीप्रमाणे, मयत सगन हा सतत आजारी असायचा. दरम्यानच्या काळात त्याची पत्नी लक्ष्मी हिचे अनैतिक संबंध सुरेशशी जुळले होते. एका दिवशी त्या दोघांनाही सगनने नको त्या अवस्थेत पाहिले होते. त्यानंतर मयत व त्याच्या पत्नीमध्ये सतत वाद होत होते. आपल्या प्रेम प्रकरणात सगनचा अडथळा येत असल्यामुळे त्या दोघांनीही त्याचा काटा काढण्याचा ठरविले. तुमच्यावर औषधोपचार करण्यासाठी आम्ही तुम्हाला गोव्यात घेऊन जातो असे सांगून पत्नीने इतर साथीदारांच्या सहाय्याने त्याला गाडीत घालून गदगहून गोव्यात आणले. मयताला दारु पिण्याचे व्यसन होते. त्या दिवशी त्याला दारुतून विष पाजण्यात आले. नंतर अनमोडला पोहोचल्यानंतर सर्व संशयितांनी नायलॉन दोरीने त्याचा गळा आवळून खून केला. नंतर तो गतप्राण झाल्याचे लक्षात आल्यानंतर त्याचा मृतदेह झाडीत फेकून दिला. दोन दिवसांपूर्वी कुळे पोलिसांना मयताची ओळख पटली होती. त्यानंतर लगेच तपासाची चक्रे हलली. कुळे पोलिसांनी त्वरित गदगला जाऊन संशयितांना ताब्यात घेतले.