मध्यरात्री पतीची हत्या, रात्रभर त्याच्या शेजारी झोपून राहिली; कारण ऐकून गावकऱ्यांच्या पायाखालची वाळूच सरकली

पत्नीच्या दाव्यानुसार तो दारुडा होता. नशेमध्ये तो अनेकदा मुलांना मारहाण करत होता.

उत्तरप्रदेशच्या झाशी जिल्ह्यामध्ये हत्येचा धक्कादायक प्रकार समोर आला आहे. एका महिलेने आपल्या पतीचीच हत्या केली आणि रात्रभर तिच्या मृतदेहाशेजारी झोपली होती. सकाळी जेव्हा लोकांना महिलेने पतीच्या हत्येमागे जे कारण सांगितले तेव्हा त्यांच्या पायाखालची वाळूच सरकली.

एका गावातील मनोहर नावाचा व्यक्ती मजुरी करून संसार चालवत होता. त्याच्या पत्नीच्या दाव्यानुसार तो दारुडा होता. नशेमध्ये तो अनेकदा मुलांना मारहाण करत होता. यामुळे ते त्रस्त होते. कालच्या रात्री पतीने मुलीवर बलात्कार करण्याचा प्रयत्न केला. यामुळे तिला वाचविण्यासाठी मी हल्ला केला, त्याच त्याचा मृत्यू झाल्याचे महिलेने सांगितले आहे. 

महिलेच्या आरोपानुसार तो शनिवारी रात्री देखील दारु पिऊन आला होता. शिवीगाळ करत होता. तो मुलीचे कपडे फाडू लागला. मुलीने विरोध केला तर तिच्यावर आणि माझ्यावर काठीने हल्ला केला. बचावासाठी मी त्याच्या हातातील काठी हिसकावली आणि त्याच्यावर उगारली. यामध्ये त्याचा मृत्यू झाला असे तिने सांगितले आहे. 

सकाळी घटनेची माहिती मृताच्या आईला आणि परिसरातील लोकांना कळताच पोलिसांना माहिती देण्यात आली. पोलिसांनी घटनास्थळ गाठून मृतदेह पोस्टमॉर्टमसाठी पाठवला. आपल्या मुलाचा खून सुनेने आणि नातीने केल्याची तक्रार मृताच्या आईने पोलिसांना दिली आहे. या आधारे पोलिसांनी गुन्हा दाखल करून आई-मुलगी दोघांना अटक केली आहे.

आरोपी महिलेने पतीला मारल्याचे कबुल केले आहे. दररोज तो दारुसाठी पैसे मागायचा. नाही दिले तर मुलीवर बलात्कार करेन अशी धमकी द्यायचा. काल रात्री त्याने बलात्काराचा प्रयत्न केला, असे तिने म्हटले आहे.