शेअरट्रेडरची डोक्यात गोळी झाडून आत्महत्या

वांद्रेत मयंक गाला नामक शेअर ट्रेडरने राहत्या घरात स्वतःच्या डोक्यात गोळी झाडत आत्महत्या केली.

मुंबई : वांद्रेत मयंक गाला नामक शेअर ट्रेडरने राहत्या घरात स्वतःच्या डोक्यात गोळी झाडत आत्महत्या केली. बुधवारी सकाळी हा धक्कादायक प्रकार घडला. त्याच्याकडे सुसाईड नोट सापडलेली नाही. व्यवसायात झालेल्या नुकसानीतून त्याने हे पाऊल उचलल्याचा संशय आहे. या प्रकरणी अपघाती मृत्यूची नोंद करण्यात आली आहे. अग्निशस्त्र कुठून आणले याचा तपास सुरू आहे.

गाला हे वांद्रे पूर्वच्या जवाहरनगर येथील साईधाम सोसायटीतील रहिवासी होते. बुधवारी सकाळी आठच्या सुमारास त्यांचा मोठा भाऊ बेडरूममध्ये झोपलेला असताना त्याला अचानक मोठ्याने गोळीबार झाल्याचा आवाज आला. त्यानुसार त्याने पहिल्या मजल्यावर धाव घेतली तेव्हा गाला हे रक्ताच्या थारोळ्यात पडलेले त्याला दिसले. ते पाहून घाबरलेल्या भावाने गाला यांना तातडीने जवळच्या रुग्णालयात नेले. तेथे दाखल करण्यापूर्वीच त्यांना मृत घोषित करण्यात आले. त्यांच्याजवळ सुसाईड नोट न सापडल्याने त्यांनी हे पाऊल का उचलले, याची माहिती मिळाली नाही. 

नुकसानामुळे तणावात
गाला यांना शेअर्समध्ये गुंतवणूक करण्याची सवय होती.  लॉकडाऊनमध्ये त्यांना खूप मोठे नुकसान झाले. ते तणावात होते. त्यातच त्यांनी हे पाऊल उचलल्याचा संशय पोलिसांना आहे.